Nongstoiñ: Ka Khasi Students’ Union (KSU) Nongstoiñ Circle ha ka sngi Saitjain jong ka taiew, ka la ioh bat ia kawei ka trok kaba don ia u No. AS 18 C 6656 kaba dei jong ki bar jylla, kiba wan ban shalan mar hapoh sor Nongstoiñ.
Ki ar ngut ki bar jylla ba la lap bad ioh bat noh da ka KSU Nongstoiñ Circle:Rupang.
Ki dkhot jong ka KSU hadien ba ki la bat noh ia katei ki bar jylla kiba don ar ngut, ki la pyrshang ruh ban kylli tohkit na ki ha kaba na ka liang jong ka Seng ka la lap ba kitei ki bar jylla kim don ia ki kot ki sla kiba biang (Trading Licence) ban wan khaii.
Katkum ka tyllong khubor na u President ka KSU Nongstoiñ Circle u samla F. Syiemiong u la ong ba kitei ki bar jylla, ki la iathuh ba ki wan ban pynhap mar sha ki mahajon kiba buh dukan hapoh sor Nongstoiñ bad u la ong ruh ba hadien ba ka Seng, ka la lap ba kim don ia ki kot ki sla kiba biang ki la phah leit phai noh ia kitei ki bar jylla na ka jaka ba ki wan.
Shuh shuh u tei u nongialam u la ong ruh ba na ka liang jong ka Seng ka maham tyngeh ruh ba lada dang lap nangne sha khmat ia kino kino ki bar jylla kiba wan ban shalan kino kino ki mar khlem ki kot ki sla kiba biang, ka Seng kan leh da kaba tyngeh khamtam lada ka Seng kan lap ba kin don kino kino kiba leh benami ban ailad ia ki bar jylla ban wan khaii ne shalan mar hapoh ka dong ka thaiñ.
“Ka KSU Nongstoin Circle ka kyrpad bad kyntu jur ia baroh ki Mahajon hapoh ka thaiñ ba kin sngewbha ban iatreilang bad ka Seng lada long kiba lah ba kin sngewbha ban iatrei kam shuwa para Khasi khnang ban nym ailad ia ki mynder ba kin suh thied bad wan ban kjit ia ka spah ka kamai ka kajih ka jong ngi khamtam ka Nongstoiñ mynta ka dang long kaba dang lait na ki ban shah khyrwait shabi ha u bar jylla ia ka kamai ka kajih ia ka khyndew ka shyiap bad kiwei kiwei ngin pynneh ia kaba la hikai la suit la shor naduh u mynbarim ban pynkhlain ban pynneh ia ka iew ka hat” ong biang u tei u nongialam.