Nongstoiñ: Ka long kaei kaei kaba sngewtynnad bad kaba pynkmen shi katdei eh ia ki paidbah nongshong shnong jong ki shnong kiba don hapoh ka sor Nongstoiñ ban iohi ia ka jingshimkhia jong u MLA ka Nongstoiñ Konstitwensi u bah Macmillan Byrsat u ba la pynlut por baroh shi sngi na ka bynta ban leit jurip kyrpang ia ki surok jong baroh ki shnong kiba don hapoh jong ka sor Nongstoiñ.
U MLA ka Nongstoin ha ryngkat ki ophisar ka tnad PWD katba ki dang jurip ia ka surok hapoh ka shnong Nongpyndeng.
Ia katei ka jingleit jurip surok kaba la long myn hynnin ka sngi Palei, la iadon lang ruh ki Engineer jong ka tnad PWD, kiba kynthup ia u bah M. Dhar Superintending Engineer PWD (Roads), Western Circle, Nongstoiñ, u bah T.S Basan Executive Engineer PWD (Roads), Nongstoiñ Division, ki riew rangbah bad ki nongialam jong ki shnong bapher bapher kiba hap hapoh ka sor Nongstoiñ.
La sdang ia katei ka jingleit jurip surok napoh ka shnong Mawkhlam – Nongpyndeng bud sa ka shnong Nongstoiñ, Upper New Nongstoiñ, Mawkawah, Tiehsaw bad la pynkut ruh ia katei ka jingleit jurip hapoh ka shnong Pyndengrei.
Haba iakren bad ki nongthoh khubor hadien katei ka jingleit jurip ia baroh ki surok kiba don ha kitei ki shnong na ka liang jong u MLA u la ong “Hadien ka jingwan u Myntri Rangbah jong ka sorkar Jylla u Conrad K Sangma sha Nongstoiñ kata ha ka 7 tarik u Nailar u la iohi ruh ba shibun ki surok hapoh ka sor Nongstoiñ kiba la sniew palat bad u la kylli ia nga ba nga la phah ne em ia kano kano ka proposal bad na ka liang ka jong nga ruh nga la ong ba nga la dep ban phah ia ka proposal ha kaba iadei bad ka jingpynbit pynbiang ia ki surok jong kawei pa kawei ka shnong kaba hap hapoh ka sor Nongstoiñ”.
Kumta na ka liang jong u MLA u la ong ba katei ka jingjurip ia baroh ki surok kiba don hapoh ki shnong kiba hap hapoh ka sor Nongstoiñ ka long na ka bynta ban ioh phah ia ka kaiphod (report) sha ka sorkar jylla khnang ban pynioh ia ka mang tyngka (Sanction) na ka bynta ban pynbit pynbiang bad ruh ban shna pynbha ia baroh kitei ki surok jong ki shnong hapoh ka sor Nongstoiñ.
Shuh shuh u MLA u la ong ruh ba ka sienjam kaba ha khmat eh kaba na ka liang jong u kum u MLA ha ryngkat ki ophisar ka tnad PWD kin shim ka long ban pynkhreh ia ka projek ia kaba yn ai kyrteng ruh kum ‘Improvement of Nongstoiñ Town Road’ ia kaba yn sa phah ruh sha ka sorkar jylla bad u la ong ruh ba kum u MLA un sa buddien khnang ba ka sorkar kan ai ia ka mang tyngka na ka bynta ban pynbha ia ki surok kiba la don lypa bad kumjuh ia ki surok shnong ki ban pyniasoh na kawei ka shnong sha kawei pat.
“Mynta la kumba 14 ne 15 snem ei ei hapoh ka thaiñ Nongstoiñ ym ju iohi shuh ia ka jingshna surok kaba thymmai lane ban siang rong thymmai bad katkum ka jingbuh thong jong ka sorkar India, lyngba ka jingwan jong u Myntri ba dei peit ia ka Ministry of Road Transport ha ka jylla ka jong ngi u la ong ba ia ka Meghalaya yn ai haduh 1000 KM ban pynbha surok hynrei haduh mynta kiba la dep ban phah (submit) ki dang don tang haduh kumba 500 KM” ong u MLA.
Ha kaba kylli pat haduh katno katei ka projek kan shim por na ka liang jong u MLA u la ong ba ka shong ha jinglah ban phah kham kloi ia ki DPR lyngba ka tnad PWD bad u la ong shuh shuh ba da ka jingiatrei lang bad ki ophisar ka tnad PWD yn ialeh katlah kat iai ban pyndep khma kloi ia katei ka projek khnang ba la kumno kumno ha u snem u ban wan yn sa lah ban pyntrei noh katba ha kaba iadei pat bad kiwei ki shnong kiba don sha khap sor Nongstoiñ u MLA u la ong ba kila don haduh palat 10 tylli ki surok kiba la ioh ban rung hapoh ka skhim PMGSY na ka bynta ban pynbha bad ban siang rong.