Baroh kiba trei shispah sngi, kin ioh painkhana ha iing q T.10,000 yn bei ka Sorkar q Lada slem bai nong 15sngi, ioh bai lutksan

New Delhi, 16 Nohprah:
Ha shwa ka elekshon Lok Sabbha, ka sorkar India, ka la nang pynkylla ia ki rukom treikam jong ka skhim shispah sngi, ha kaba yn bei pisa ruh T.10,000, ia baroh ki nong trei bylla shispah sngi, ba kin shna painkhana bad ban ai jingiarap, ia ki kynthei, ba ki thaw ia ki seng iatreilang jongki.
Nalorkata, la rai ruh ba dei ban siew bai lutksan ia kito kiba ioh slem ia ka bai nong jongki, palat ia ka 15sngi bad ia katei ka bai lutksan, yn buria, na kito ki nongtrei, kiba don kti, ha kaba pynslem ia katei ka jingsiew bai nong.
“Uwei pa uwei u nongtrei bylla shispah sngi, un ioh ia ka pisa kaba long hapdeng ka T.4,500 haduh T.10,000 ba kin thaw painkhana” ong u myntri kam pynroi nongkyndong jng ka sorkar India, U Jairam Ramesh. “Mano mano ba don ia katei ka kad shispah sngi, wat lada u dei u apl (above poverty line), un ioh ia ka bai shna painkhana kaba T.10,000 ha iing” ong u myntri.
Halor ka jingpynslem bai nong, la iathuh ba lada ka slem palat ia ka khadsan sngi, kumta yn siew bai lutksan, kaba long 0.05 percent na ka bynta shisngi bad ia katei yn khate, na ka tulop jong kito ki nongtrei, kiba pynslem, ha kaba siew bai nong.
U myntri, u iathuh ba ia ka bai nong, dei ban siew, na ka jing wan trei bad ka jinglah ban trei ia ka kam, ha kaba u ong “Nga sngewsih, ba ha kiba bun ki Jylla, la shu siew bai nong, tang ia kito kiba wan trei”.