Shillong: Ka Education Cell jong ka KSU Central Body ka la pynbna ba baroh kind dkhot jong ka KSU na ki unit bapher bapher ki dei ban wan ia shim bynta ha ka rally ka KAS ka ban long ha ka 22 tarik mynta u bnai ha madan Malki. U secretary jong ka Education cell u samla Readyon S Nongrum haba ia kren bad ki nongthohkhubor mynta ka sngi hakhmat u mot Kiang Nangbah ha State Central Library u la ong ba ha baroh kawei ka bri u hynniewtrep ki don da ki phew hajar ngut ki dkhot jong ka KSU. U la ong ba mynta ka sngi ki nongialam ka KSU kin leit ia kynduh ia ki Principal jong ki kolej bapher bapher ba kin phah ia ki samla pule sha katei ka rally ban dawa ban pynrung ia ka ktien Khasi ha ka khyrnit ba 8 jong ka riti synshar ka ri Bharat.