Shillong: Hadien ba la thaw ia ka ha ka 3 tarik u risaw, mynta ka sngi ka sengbah ki Khlieh Nongsynshar kaba don hapoh ka lama jong ka Council of Traditional Chiefs and Headmen ki la pynlong ia ka Executive Committee ba nyngkong jong ki na ka bynta ban pyntyllun ia ki kam ba ki dei ban leh nangne shakhmat. Katei ka jingialang ka long mynta ka sngi ha ïng Dorbar ka hima Mylliem. Ia katei ka jingialang la pyniaid da u Chairman jong katei ka seng u Pa’iem Niandro Syiemiong u Syiem jong ka Hima Maharam.
Haba kren hadien ba la wai ka jingialang u Secretary jong katei ka Council u Pa’iem Ainam Manik Syiem uba dei u Syiem jong ka Hima Mylliem u la ong ba ha katei ka jingialang la ia kren ia ki bynta kiba hakhmat eh ba katei ka Council kan iaid shakhmat ban pyntyllun ia ki kam jong ka bad la lum ruh ia ka EC ban pan jingmut na ki dkhot ia kiba kum kino ki kam ban pyntyllun bad ia ki rai baroh kin phah sha ka District Council ba kan tip.
Ha katei ka jingialang la rai ba baroh ki Shnong kiba hap ha ki Hima bapher bapher bad ki Sirdarship bapher ba ki dei ban pynpoi ia ka thup kyrteng ki Rangbah Shnong jong ki ha ki Khlieh jong ka hima ba ki synshar ha ki Syiem ne ki Sordar ba ka Council kan ioh ia ka thup kyrteng jong ki Shnong baroh khoit bad ia ka thup kyrteng jong baroh ki Rangbah Shnong.