Baroh ki seng riewlum, ki kyrshan ïa ka jingïasoi MoU, ong u MR

Shillong:U Myntri Rangbah ka jylla u Conrad Sangma, myn hynnin ka sngi u la ong ba baroh ki seng saiñ pyrthei ba don ha ka sorkar ki kyrshan ïa ka jingïasoi MoU ha kaba ïadei bad ki kam pynbeit pud. U Conrad u la ong ba ym don uwei ruh u Myntri na ka seng HSPDP, PDF, UDP bad BJP kiba pyrshah ïa ka jingïasoi MoU bad u la ong ruh ba ki nong ïalam ka party kim pyrshah ïa kane ka kam bad lada don kiba pyrshah ruh ki pyr shah kum ki riew shi met ym satia kum ka parti kaba ki don namar kat haduh myn ta ym don uwei ruh u Myntri ne u President na ki seng riewlum ban ai jingthoh ne wan kynduh bad u halor kane ka kam.

Shuh shuh u la ong ba ka jingthmu ka KHADC ban leit tied jingkhang sha ïing kashari um lah ban ong eiei namar ha ka synshar paidbah baroh ki don ka hok ban leit tied jingkhang sha ka lada ki sngew donkam.
Haba la kren halor ki mat ban ithuh da ka aiñ ïa ka kam khalai na ka liang u Myntri Rangbah u la ong ba ka daw ba ka sorkar ka wanrah ïa kane ka aiñ ka dei beit ban ïoh lum khajna bad u la pynshai ruh ba ka kam khalai kaba ka sorkar kan buh ha khappud bad ka Assam kan dei beit thik tang na bynta kiba na bar jylla bad lada don ki nongpynïaid ïa ki jaka khalai kiba shah ïa ki trai jylla ban shim bynta ka sorkar kan weng mardor ïa ka licence jong ki. Shuh shuh u la ong ba kumba long mynta ki kam ba hap ha ka thup khalai ki la don la slem ka sorkar ka thmu tang ban wanrah da ka aiñ ban ïoh jingmyntoi uba bun balang na ka khajana ba ka Sorkar kan ïoh lum.

Haba jubab pat halor ka jingkylli ha kaba ïadei bad ki jingdawa ki nonghikai ad-hoc na ka liang u MR u la ong ba ka sorkar lyngba ka tnad pule puthi ka la don ka jingïakren ïa kane ka mat bad shen kan sa leh eiei ïa ka jingdawa ki nonghikai. Shuh shuh u la ong ba ban leh ïa kaei kaba ki nonghikai ki dawa ka sorkar ka donkam bun bha ka pisa da kaba ong ruh ba ka jingpynlong aiñ ïa ka khalai ruh ka long beit ban ïoh kajna ban kyntiew ïa ka pule dangle ha ka jylla. Shuh u u la ong ruh ba ka sorkar ka la mang pisa ruh ïa kiba bun tylli ki skul ha ka jylla ban ïoh pynbha bad pynjanai na kaba ki long mynta.

Shuh shuh haba kren halor ki ñiut ha sor Jowai na ka liang u MR u la ong ba ïa kane ka kam ruh shen ka sorkar kan sa poi sha ka rai kaba yn hun da baroh da kaba ong ba ïa kane ka mat la aiti beit ha u Bah Prestone u Symbud Myntri Rangbah bad u Sniawbhalang Dhar u Myntri ka tnad pynroi sor ban peit ïa kaba donkam.

Haba kren halor ka mat Them Ïew Mawlong, u la ong ruh ba ka sorkar ka kwah ban weng syndon ïa ka jingeh kaba mih na kane ka jaka bad u la ong ruh ba kumba long mynta kam pat don ka rai hynrei dang tang ki jingïakren bad kiba sah ha katei ka jaka.