Nongpoh: Haba kren ha ka rally ialap Ilekshon ka Congress ha Umden, Bah James Lyngdoh, Vice President ka Megahalaya Pradesh Congress Committee (MPCC), ula ong ba baroh ki seng riewlum, kaba kynthup ia na NPP, UDP lem bad kiwei kiwei, ki dei ki Team-B ka BJP.
U Bah James Lyngdoh, ula ther tyngeh ruh ia kito ki MLA Congress kiba la mihnoh na ka Congress, da kaba ba kito ki MLA kiba la mih na ka Congress ki dei kiba la dep ban kjit haduh da kdang na ka Congress bad ki sa kynnoh pat laiphew jait ban pynbudnam sniew ia ka Party Congress.
Shuh shuh, u ong ruh ba kitei ki MLA kiba la mihnoh na ka Congress, ki dei ki MLA ki bymler bad ki dei ruh ki MLA kiba mynthi bad ki bym ju pynmih jingkylli ei ei ha Assembly.
Namarkata, ka long ruh kaba sngewthamula ia kine ki MLA, namar ha ka por ba ki dang don ha ka sorkar, kim ju bein ia ka Congress bad kidei ruh kiba hakhmat ban ai jingiaroh ia ki kam kiba la leh da u Dr. Mukul Sangma, uba long ruh kum u Myntri Rangbah ka sorkar jylla, hynrei tang mar ia mih na ka Congress, dei kine hi ki juh ki MLA, kiba la pynmih ia ki kyntien kiba Laiphewjait ban bein ia ka Congress bad ban kynnoh kynta ia u Dr. Mukul Sangma, u la bynrap.