Shillong: U Conrad K Sangma, myntri Rangbah ka jylla, u la ong ba ka jingeh kaba ki nonghikai SSA, ki mad kam dei tang ha ka jylla Meghalaya hynrei baroh ki nonghikai SSA ha ka Ri kim pat ioh ia ka tulop jong ki mynta la san bnai.
“Ki nonghikai SSA ha ka Ri baroh kawei kim pat ioh tulop la ka dei ha Maharashtra, Madhya Pradesh, Assam,Tamil Nadu, Karnataka bad kiwei kiwei la san bnai bad kane kam dei ka jingeh kaba ngat tang ia ki nonghikai SSA ha ka jylla, Meghalaya, hynrei na ka liang ki Myntri rangbah bad ki myntri ka tnad pule puthi ki dang bteng ban bud dien ia kane bad ka tnad pule puthi jong ka sorkar pdeng”la ong u Myntri rangbah ka jylla ha ka sngi Balang.
U Conrad K Sangma, u la iathuh ban wad ia ka, lada ka lynti halor kane ka jingeh bad na ka liang u Myntri ka tnad pule puthi u la leit sha Delhi bad u dang shu wan mynta ka sngi, ha kaba u la pynsngew ia kane ka jingeh.
“Hynrei kaei ka ba ong ka long ba kam dei tang ka jingeh ki nonghikai SSA ha ka jylla Meghalaya hynrei baroh kawei ka Ri ki nonghikai SSA kim pat ioh ia ka tulop ka ba san bnai jong ki bad namar ba ka dei ka skim jong ka sorkar pdeng ka ba 90% ka wan na ka sorkar jylla kumta ka long ka eh na ka bynta ka sorkar jylla ba kan siew ia ka tulop jong ki na ka pla lade”u la ong. “Mynta haduh san bnai ka tulop ka ba dang sah jong ki ha kaba kan kot da kumno kumno ruh sha T.150 klur ban siew ia ki, kam long kaba suk na ka bynta ka sorkar jylla ba kan sei ia kane ka pisa namar ba ka la bun palat”u la bynrap shuh shuh.
U myntri rangbah u la ong “Ngi sngewkhia bad ngi tip halor ka jingkhia jingshon jong ki nonghikai SSA ha kaba na ka liang ki Myntri rangbah bad ki myntri ka tnad pule puthi na ki jylla bapher bapher ki la ialeh ban pynsngew ia kane sha ka sorkar pdeng bad nga kyntu ia ka Sorkar pdeng ba kan pyllait noh ia ka pisa sha baroh ki jylla, na ka bynta ki nonghikai SSA”. Haba ia kren halor ka ne ka bynta na ka liang u myntri ka tnad pule puthi u bah Lahkmen Rymbui u la ong ba u kyrmen ba ha u taiew ban wan, na ka liang jong ka sorkar pdeng kan lah noh ban pynlait ia ka tulop ki nonghikai SSA bad nga thairai ba ka tulop ka ba kin pynlait kan long na ka bynta 2 bnai.
Haba kylli, u bah Rymbui, u la ong ba ka sorkar pdeng ka la dei ban shim ia ka lad ka lynti ka ban lah ban weng ia kane ka jingeh shisyndon, ha ka ba haduh mynta ka sorkar pdeng kam ju siew man u bnai, hynrei ka ju pynsah saw bnai san bnai bad lada ka siew man u bnai kan poi T26 klur shibnai.
“Ka fund ka dei ka ba la ioh na ka sorkar pdeng bad ka long ka ba eh bha na ka bynta ka sorkar jylla ba kan siew hi, namar ba haduh T.26 klur shibnai ngi donkam ban siew ia nonghikai SSA bad kane ka jingeh jong ki lah ban weng tang lada ka sorkar pdeng kan pyllait ia ka fund kum ba ka la kular”u la ong.
Phi don ban ong eiei?