Baroh ki MDC KHADC ki kwah long CEM, ong u Mukul

Shillong 16 Lber:
Halor ka jingmih ka kynrum kynram ha KHA DC, u Myntri Rangbah ka jylla u Dr Mukul Sangma u la ong ba imat baroh ki MDC ka KHADC ki kwah ban long CEM.
 ”Lehse ki dkhot ka KHADC ki kwah ban long CEM” la ong u Dr Sangma haba kren kaei ka jingsngew jongu ia ka jingmih ka kynrum kyn ram ha KHADC.
U Myntri Rangbah u la ong, “Tang hapoh shi snem, katno tylli ki EC la kylla bad katno ngut la long CEM bad katno ngut ki CEM ba ki iapyrshah”.
Halor ka jingkylli hato la donkam palat ban don noh ka ain khang pyrshah kyntiap seng, u Myntri Rangbah u la ong, kane ka dei ka mat kaba la iakren la bunsien da ki seng sain pyrthei.
 ”Ha ki snem ba la dep, ngi la don ka sorkar synrop bad ki seng riew lum, ngi la iakren ia kane ha ka Parliamentary Party (PP).  Ka donkam ban eksamin la ka ain kyntiap seng kumba don ia ki MLA, ka donkam ne em ha ADC”, la ong u Dr Sangma.
U la ong ba u la ju kren bunsien ba ka jing synjor ka sorkar ka wan rah ia ka jingsahkut lut ki kam ki jam bad ki paidbah kin iakynduh jingeh.
 ”Ka donkam ban don ka jingskhem ha ka sorkar ne ha ki District Council khnang ba kan lah ban pyntreikam ia ki kam pynroi namar ba khlem ka jingskhem, kan wanrah ka jingeh ia ki paidbah bad ka jylla”, la ong u Dr Sangma.
 Halor ka jingkynnoh ki seng riewlum ba dei ka sorkar kaba pynkhihwin, u Dr Sangma u la ong, ba ki MDC ki seng riewlum ki dei ban long kiba kohnguh sneng ia la ki party jongki.
 ”Ha ka kyrteng ka party ki leit sha ki paidbah ban pan ia ka bor, lada kim lah ban pynbeit ia la iing ha ka rukom kaba dei, ki dei ban sangeh ban kdew kti ia kiwei ki seng sain pyrthei”, la ong u Myntri Rangbah.