Baroh ki kam sorkar ha Madhya Pradesh, yn ai beit tang ia ki trai shnong

U Shivraj Singh Chauhan, myntri rangbah ka Madhya Pradesh, ula pynbna mynta ka sngi, ba baroh ki kam sorkar ha katei ka Jylla, yn ai kam tang ia ki trai shnong ba pura jong ka Jylla. Katei ka rai, ka kren shai, ba ki briew kiba nabar Jylla, kin nym ioh kam shuh satia nangne shakhmat ha ka Jylla Madhya Pradesh.

“Ka sorkar Madhya Pradesh, ka la shim ia ka rai kaba kongsan bha mynta ka sngi bad kata ka long ba kan ai kam ai jam, tang ia ki samla trai jylla bad ngi dang pynkhreh pynkhrum, ia ki jingdonkam kiba iadei bad katei ka bynta” ong U Chouhan ha ka video jongu mynta ka sngi.

Katei ka jing pynbna, jong U Chouhan, ka long ha shwa ba ka Jylla, kan jied ia ki 27 ngut ki dkhot ba thymmai jong ka dorbar Jylla, ha ka elekshon shiteng samoi, ka ban sa long shen.

Kham mynshwa, U Kamal Nath myntri rangbah barim ka sorkar Madhya Pradesh, u pynbna ba yn ai kam haduh 70 percent ia ki trai Jylla, ha baroh ki kam karkhana.