Baroh ki jingkynnoh ki Hindu, dei ki bym don Nongrim, ong u Archbishop

Shillong:Ka kynhun jong ki shitniam Hindu ki la ai por ïa ki skul Khristan hapoh jylla Assam ban pynduh noh ïa baroh ki dak ki shin kiba kynthup ïa ki jingmlien ha kaba ïadei bad jingngeit Khristan.
U Satya Ranjan Borah, president jong ka seng shitniam Hindu ka Kutumba Surakshya Parishad u la ong ba kane ka jingleh ka mut ban pynsangeh ïa ki Khristan ban pyndonkam ïa ki Skul na ka bynta ki kam pynkylla niam.

“Ki missionari ki la pynlong ïa ki skul bad ki jaka pule sha ki jaka pynkylla niam Kristan. Ngin ym shah ïa kane,” u la ong haba ïakren bad ki lad pathai khubor.
Ïa ka Assam la synshar da ka seng kaba don jingïadei bad ki Hindu ka Bharatiya Janata Party (BJP) jong u Myntri Rangbah duh u Narendra Modi.

Katei ka kynhun ka kwah ba ki ïa ki durmot lane ka dur jong u Jisu lane jong ka Maria badei ban weng noh hapoh ka 15 sngi ïa baroh ki skul Khristan bad lada kim kohnguh ïa kane kin ngat ha ka jingshah pynjynjar kaba eh.
U Borah u la ong ba u kwah ba baroh ki Lyngdoh Sohblei, ki sister bad ki brother kiba trei ha ki skul Khristan ban sangeh ka phong jaiñlieh (cassock) bad kino kino ki sopti ka Balang hapoh phyllaw jong ki skul.
U la kynnoh ïa ki ba ki la kyntiew ïa ka niam Khristan ha ki skul lyngba ka jingwah ne buh ïa ki dak ki shin jinglong Khristan.
Ha kaba ïadei bad kane ka jingai por na ka liang u Archbishop John Moolachira jong ka Guwahati u la ong ba baroh ki jingkynnoh kidei kiba khlem nongrim.

“Ngi la tip shaphang kane ka jingbyrngem bad ngam tip balei kane ka la jia,” ong u Lyngdoh Sad haba ïakren bad u UCA News.
Ki Khristan ki la long kiba la donkti lah bun bun snem ban kyntiew ïa ka pule puthi sha ki thaiñ ba kyndong jong ka jylla Assam, khamtam sha ki longïing kiba duk jong ki thaiñ riewlum.
“Ka long ka jinglong jingman kaba eh bha ha kala mih kane ka jingbyrngem kaba pylleiñ pylleiñ,” ong u Lyngdoh Sad bad bynrap ba kin wad ïa ki lad ki lynti lyngba ka aiñ ban ïaleh ïa kane ka jingshah byrngem kaba paw pylleiñ pylleiñ.
Kitei ki seng shit niam hindu ki la kyntu ïa ki Lyngdoh Sohblei, ki sister bad ki brother ban phong da ki jaiñ paidbah hapoh phyllaw jong ki skul, kaba long kum ka jing maham.

Katei ka kynhun shit niam hindu ka la kwah ruh kumjuh ba ki Ïingmane kiba don hapoh ki ïing skul badei ban weng noh, ïathuh ka Northeast Now news portal.
Ki Nongïalam ki Khristan ki la ong ba kin leit ïakynduh ïa u Myntri Rangbah ka Assam u Himanta Biswa Sarma, uba dei ruh u Nongïalam ka BJP.
Ki Nongïalam ki Khristan ki la ong ba ka jingma ïa ki Khristan bad ki kam ki missionary ka la kiew bha ha kine ki snem ba la leit ha baroh kawei ka thaiñ shatei lammihngi ka India.

Lah ban ong ba ki Khristan ha jylla Assam ki don tang kumba 3.74 percent na ka jingbun paid ki nongshong shnong ka Assam kaba long Assam 31 million.