![](https://www.urupang.com/wp-content/uploads/2023/10/image-9.png)
Shillong:Katkum ki nongmuna kiba la lum ka seng Federation of Khasi Jaintia and Garo People (FKJGP) na kylleng ki jaka ha sor Shillong, dei tang na Mawblei bad na Demthring kiba bit ban pyndonkam, hynrei lait nangta, baroh, kim long kiba bit ban pyndonkam, bad ia kane, la lap ka test na ka State Food Testing Laboratory Commissionerate of Food Safety, Pasteur Hills, Shillong.
Na ki 46 tylli ki jaka kiba leit tong um ka FKJGP, 44 tylli la shem ba ki don ki khniang ne codiform bad E. coli.
Halor kane, ka FKJGP, mynta ka sngi ka la ujor sha u Myntri Rangbah ka jylla u Conrad K Sangma halor kane ka jinglap katkum ka test ba ka sorkar ba kan shim ia ki lad ki lynti ban pynthikna ba ka um bam um dih kaba sam ka tnad Public Health Engineering (PHE) sha ki paidbah, ka dei ban long kaba khuid bad kaba bit ban pyndonkam u briew.
U President ka FKJGP u bah Dundee Khongsit, u la ong ba u Myntri Rangbah, u la pynthikna ba ka sorkar kan shim khia ia kane mardor.
U bah Dundee, u la ong ba ka seng ka la leh ia kane hadien ba ka la ioh ia ka jingujor na ki paidbah kylleng ki jaka ha sor halor ka jinglong ka um bam um dih.
“Lada ngi ioh jingujor, ngi leit tong ia ka um nongmuna ban leh ia ka test, ym ban shu kynnoh khlem lap ia ka jingshisha pyrshah ia ka PHE. Bad kumba ka long mynta, ka lap shisha ba ka jingkynnoh jong ki briew ka long kaba dei bad na kata ka daw, ngi la iakynduh ia u myntri rangbah ban iakren ia kane ka kam”, la ong u bah Dundee.
Phi don ban ong eiei?