Ban wanrah ia ka khuid ka suba ha ka thungkam thungjam, kynduh bad phah jingthoh ka KSU sha u DC

Nongpoh: Ki nongialam ka KSU, Employment and Monitoring Cell ka North Khasi Hills District, ia kaba la ialam da u Samla Banjop Maring, mynta ka sngi ki la leit ban kynduh ia u Raja Brahma, ADC uba dei ruh u Member Secretary ka District Selection Committee ha Ri-Bhoi District, na bynta ban iakren bad phah ruh da ka jingthoh, na bynta ban wanrah ia ka khuid ka suba ha ka thungkam thungjam ha ka Distrik.

Ha katei ka sngi, na ka liang ki nongialam ka KSU, ki la thmu ban leit kynduh ia u Deputy Commissioner, hynrei namar ka jingbymdon u DC, kumta ki la kynduh noh ia u ADC bad kiba la ioh ban pynsngew ia shibun ki mat kiba iadei bad ka rukom thungkam thungjam ba khuid ba suba bad ka ban pynhun mynsiem ia ki samla wadkam wadjam.
Lyngba jong katei ka sngi, ba kitei ki nongialam ka KSU ki la leit ban kynduh ia u ADC, ki la ioh ban iakren halor 15 tylli ki mat jingiakren bad ka KSU ka la dawa na ka sorkar jylla, kita kiba kynthup naduh kaba thung ia ki Vice Chairman bad dkhot ha ka DSC, ki dei ban long kiba ym don kano kano ka jingiadei bad ki politician ne ha ki kam sain hima sima.

Nalorkata, ban pynbna man u snem ia ka jingdon jingem, ki samla wad kam ki dei ban long ki nongshong shnong ha ka jylla Meghalaya, ban kiar noh ia kaba thung ia ki kam kontrak/ adhoc bad casual, ban pynmih ia ka eksam man u snem khlem da pynslem por, ban pynpaw paidbah ia ki marks jong ki samla wad kam, kam dei ban don ka jingkylla ha ki roll no ha ka por thungkam, ban pynbiang ia ka carbon copy jong ka kot OMR sha ki kyrtong, ban pynlait ruh ia ki jubab jong ki jingkylli, ban pyndep ia ka jingthungkam hapoh 6 bnai hadien ka eksamin, ban pynduh noh ïaka personal interview haka kyrdan B, C bad D, ban ai ia ka kaiphod ba man la u snem da ka DSC, ki jingkylli ki dei ban long kiba rieh ba kin nym lait shabar, ban buh da ki kor computer ban iakhun ia ki eksam ha ki por ban wan.

U Samla Banjop Maring, Chairman ka Employment and Monitoring Cell ka KSU, NKHD, haba kren sha ki lad pathaikhubor, u la ong ba kum ka seng ka la ioh ban kren sani bha ha katei ka sngi bad u ADC, ha kaba ka seng kumba la bthah da ka KSU sengkmie, ka long ba kyntu ia u ba u dei ban pynbeit pynbeit ia ka rukom thungkam thungjam kaba khuid bad ba kam dei ban don kane kano ka jingleh tuh leh shukorm hynrei ka dei ban long kaba khuid ba suba bad ka ban pynhun mynsiem ia ki samla wankam wadjam.