Ban tip ki briew ia ka Dong Mihngi, nga iai kren ha Parliament: Rijiju

Shillong, 27 Nailur:
U Myntri khynnah ka sorkar India ba peit ia ka tnad kam pohiing u Kiren Rijiju u la ong ba ka jingbym tip ki briew ia ka Dong Mihngi ka la pynlong ia u ban shim da kawei ka rai ba un kren bun sien ban ia kiwei hapoh ka iing dorbar ha ka por ba u jop nyngkong.
“Wat ha ka parliament bun ki MP kim tip ia ka Dong Mihngi kim tip ia nga ba long MP naei.Haba nga  ioh sngew ia kane, nga la rai ba ngan kren bun sien hapoh ka parliament khnang ba ki briew ka ri India kin tip ia kane ka thain jong ngi”, la ong u Rijiju haba kren ha ka jingpyni kolshor ba la pynlong da ki samla pule na Arunachal Pradesh ha Shillong ha kane ka sngi Saitjain.
U la ong ba ka dong mihngi ka donkam ban pynpaw ialade khnang ba kiwei kin tip.
“Haba ngi leit shabar ka thain mihngi ki briew kim tip ia ngi ne ym don ba tip ia ngi bad kane ka la wanrah ia ka jingsngew ingkhong ia ngi”, la ong u  Rijiju uba dei na jylla Arunachal Pradesh.
“Hynrei, ngi sngew thuh ba ki don ki lad ki lynti ba ngin leh ba kiwei kin tip bad burom ia ngi”, u la ong.
Katkum ka jingong u Rijiju ka jingbym tip ki briew ia kane ka thain Mihngi ka dei lehse namar ba kam don ka jing pynphriang ia ka khubor kaba biang na ki bor ba dei peit.
Ha kane ka sorkar kaba mynta, la bthah ia ka tnad shang pyrthei, ban pynlong ia ka tamasa kolshor na kane ka thain ha man ki nongbah ba heh ka ri khnang ba ki briew ka ri India kin tip. U la ong ruh ba ka tnad Human Resources Development (HRD)  ka la pynkhreh ban pynrung ia ki khana kane ka dong mihngi ha ki skul  bad ha ka UGC.
U la ong ba ka ri India ym shym la thaw na Delhi hynrei ia ka ri la sdang na ki khappud.
”Lada ka Delhi ka dei ka metbah, ka jylla jong nga ruh ka dei ka metbah jong ka ri.
Ka ri ka sdang na khappud ym na  Delhi”,  la ong u Rijiju.
U pynpaw ia ka jingsngew khia ia ka jingiasjrut para jaitbynriew kane ka thain Mihngi ka India bad u la ong ba ka la dei ka por ban pynkut noh ia kane namar ba ka jingiaumsnam kan nym poi shaei shaei ruh hynrei kan pynjot tang para thain mihngi.
U la ong ba kane ka thain ka dang sahdien tang ba kam pat biang ki surok, bording, jaka pule, ki lad sumar. “Ha kiwei ki ri ba la kiew, kine kim dei shuh ki kam ban iakren namar ba la biang hynrei ha kane ka thain jong ngi, kine ki dei ki mat ba kongsan”, la ong u Rijiju.