BAN THUNG SHI MILIAN SHITENG KI DIENG BAN JYRNGAM KA MARIANG?

Da u Bah Philip Marweiñ

Ka Sorkar Meghalaya, lyngba ka jingkyntu jong u Chief Minister jong ka jylla, ka la buh ia ka thong ha kane ka snem ban thung shi milian shiteng tynrai ki dieng ban pynjyrngam pat ia ka mei mariang kaba la dkhaw palat bad kaba wat ki tyllong um ruh mynta kim kyrsoi shuh ban ioh umbam umdih. Shisha, mynta ngi la poi sha ka jingjynjar kaba khraw ba ngin ioh umbam umdih, khamtam ha ki jaka sor bad wat ha ki jaka shnong kiba la kham bun paid ruh. Ia kane ka jingbuhthong jong ka sorkar – ban thung dieng, ngi dei ban iaroh shibun bad ba mangi baroh, manla uwei pa uwei u nongshongshnong, u don ka kamram hakhmat ka mei mariang, ban kitkhia lang bad ka sorkar da kaba iathung la kumno kumno mar san tynrai ki dieng ha kane ka aiom, bad ban kitkhia ruh ba kine ki tynrai dieng ba ngi thung, kin im bad kin khie kin san haduh ban da long ki diengbah diengsan.

Kine ki dieng ki lah ban dei ki diengsoh na kiba ngin ioh jingmyntoi shibun bad ki lah ban ym dei ki diengsoh ruh kam pher, tangba ngin iathung lem baroh baroh ha ki kper lajong lane wat ha kino kino ki jaka kiba lait kiba long ban thung dieng. Ka jingmyntoi ha kaba kut hi kan long ka jong ngi bad ki longdien mandien, namarba, ki dieng hi, ki ai jingtngen ia ka mei mariang bad ki kjit ia ki jynhaw um na ka haw haw bad ki pyntngen bad pynsbur ruh ia ka khyndew haduh ba, ha ki jaka ba don shibun ki dieng, ngi ioh ia ka jingkyrsoi um ha ka khyndew kaba ngi donkam palat. Na ki dieng ki ioh shibun ki jingmyntoi kiba ngim lah ban jer lut hangne, hynrei na ki dieng bad ki khlaw ki btap ngi ioh shibun ki jingmyntoi bad ki jingkyrkhu.

Mynta, to ngin iaphai sha ka kam thung dieng. Naduh ki longshuwa jong ngi, ki da kheinkor bha ia ka kam thung dieng ban pynlong khlaw ia ki lum, ki ranab lum bad ki them ruh. Ngi dang kynmaw bha ia kito ki por ha kaba ki parad bad meirad jong ngi ki ju thung dieng ha kito ki lum bad ki jaka kiba lait bad ki da leh shitom kumno ban saiñ (lait) na ka ding kaba lah ban pur sha kine ki jaka thung dieng, khamtam ha ka por myntlang ioh ba ka ding kan bam lut ia ka lum ka them baroh phar. Ki da saiñ bha ha kata ka rukom ba ka ding kam lah shuh ban poi sha ka jaka thung dieng. Ia ka jaka lum ba la saiñ bha ki thung da ki diengrit lane ki bet da ki symbai dieng ba kin mih bad ia ki tynrai dieng ruh ki da sumar bha ban ym sop da ki nuit ki nier lane khum da ki kynbat lane kynjia jyrmie khlaw. Oh ki meirad parad bad ki kmie ki kpa ki da niewkor bha ha kane ka liang.

Hadien pat la sdang mih sa ka juk rakhe mei mariang ba la ialam da ka sorkar lyngba ka Forest Department bad ka Soil bad Water Conservation. Oh la iashongshit ban thung dieng ha manla ka 5 tarik u Jylliew da ka tamasa prokram bad da kaba pyndonkam ia ki shnong ki thaw, ki khynnah skul bad ki briew sorkar baroh hajan baroh ki jaka. Hynrei, hadien shi bnai ar bnai jah kyndam sa ki tynrai dieng, tip shano ki la jah. Jin da la kheinlang ia baroh ki tynrai dieng ba la thung ha ka kylleng ka jylla baroh shi katta ki snem, ym lah kheinlang shuh bad ka jylla kan jin da la syrtap tang da ki khlaw suda. Hynrei na ka shi lakh tynrai dieng lehse tang shi hajar ki tynrai dieng ki im ne em haduh ba kin da heh bad san bha. Tang ba, ha kajuh ka por ngim lah ban len ba ki la mih ki dieng bah ruh na kine ki jingthung dieng. To ia kaba la dep, la dep, hynrei kaba donkam ha kane ka jingpyrshang kaba mynta ban thung shi milian shiteng ki dieng ka long, ba kine ki dei ban im haduh ba kin kylla long ki diengbah. Ban thung ia kine ki shi milian shiteng tynrai ki dieng, ka sorkar ka la ioh jingiarap peisa haduh T.10 klur na ka UNDFCC. Ia kane ka kam, ka sorkar ka la aiti ban thung ha ka Soil bad Water Conservation Department, bad ia kine ki shi milian shiteng tynrai ki dieng, la thung ha ki 303 tylli ki jaka ba kyrsoi um (Watersheds) ha kylleng ka jylla. Ka jingthmu ka long ba kine ki tynrai dieng ynda ki la heh la san kin sa lah shuh shuh ban kyrsoi um ha ki jaka ba la thung ia ki, bad na kine ki jaka yn sa nang kyrsoi shuh shuh bun tylli ki umpohliew kiba shngiam, ban ioh tong bad ban ioh dih, bad kumjuh ruh ban lah ban kyrsoi ban kylla sa ki wahduid bad wah heh ruh.

La nang mih shuh shuh ki khubor ba bun ki shnong bad ki seng bhalang ruh kin iasoh lang ban thung dieng ha kane ka sngi 5 tarik u Jylliew, 2019. Da ka jingiasnoh kti lang jong ki shnong ki thaw bad ki seng bhalang lei lei ha kane ka sngi ka jingthung dieng kan kham palat ban ia ka thong ba la buh da ka sorkar. Ki don ki seng bhalang kiba kum ka Bakdil jong ka Garo Hills, kiba la dep mang ban thung da ki diengsoh shisyndon. Kane lei lei ka nang ai shuh shuh ka jingmyntoi bad ka jingkyrmen ia kane ka thong. Mynta, ka jingkyntu ka long ia ki shnong ki thaw, ia ki skul, ki kolej, University, ki seng bhalang baroh bad ia ki briew shimet shimet, ban ianoh synniang lem da kaba thung la kumno kumno mar mar shi tynrai ki dieng soh, lane kino kino ki jait dieng heh ym ki jait dieng rit, khnang ban pynroi ia ki dieng ha ki shnong bad ngin ioh shibun ki jingmyntoi, ym tang ha ka ioh lyer khuid, hynrei ban kyrsoi um biang ki jaka ban tngen pat ka mei mariang jong ngi.

Kawei kaba donkam eh haba la thung bun tynrai ki dieng ha kane ka rukom ka long ban peit bha bad phikir ba ia ki dieng ba la thung, dei ban sumar sukher bha ia ki, ba kin long kin man bad kin kylla diengbah hadien habud. Hab ban da ker bha, ban ai um bad ban ym shah wiang ha ka ding namar haba la bun tang ki nongthung dieng hynrei ym don ba sumar bad phikir ki tynrai dieng kin ym im bad kim heh kim san satia. Na ka liang ka Soil bad Water Conservation pat kam dei ban nang tang ban tih thliew bad ban thung bad ban ioh thep pla ia ka T.10 klur, hynrei ka dei ban pynthikna ba ki tynrai dieng ba la thung kin iohi ia ka lawei jong ki, bad khamtam eh, ba ki umpohliew kin kyrsoi shaid shaid na kine ki 303 tylli ki tyllong um (Watershed Areas).