Ban suk ha ka por ap kali, pynshna sem ap kali ka longing na Saiden

Nongpoh:Kawei ka longiing na ka shnong Saiden ha Ri Bhoi, ka la pynshna sngewbha da kawei ka sem ap kali sha ki paidbah ka shnong, kata na bynta ba kin suk ha ka por ba ki ap kali hapoh katei ka shnong bad ia katei ka sem ap kali, ki la aiti sha ka shnong ba kin peit na bynta ka khuid ka suba bad ka ban ai jingmyntoi shisha sha ki paidbah ka shnong.

Katei ka longiing ka dei ka iing ka sem jong Bah Evansis Jones Myrthong, ha kaba ki la pynshna sngewbha da katei ka sem ap kali paidbah (Passenger shed) sha ki paidbah ka shnong, ka long ruh kum shibynta ban ai burom ïa u kpa jong ki, u (L) Stenshon Lyngdoh, bam kwai ha dwar u Blei.
Ia katei ka sem ap kali, la plie mynta ka sngi, ha kaba na ka liang ka Dorbar Shnong Saiden, ka la plie paidbah ha kata ka dur kaba ishongkun bad kiba la ot ribbon, haswa ba ki paidbah kin ioh ban pyndonkam ia katei ka sem ap kali.

Kiba la sakhi ha kaba plie ia katei ka sem ap kali, ki kynthup ia u Bah EK Lapang, Rangbah Shnong ka Shnong Saiden, uba la long kum u kongsan, nangta kiwei ki nongialam ka shnong kiba kynthup ia u Bah M.G Kharshanlor, u Bah Evansis Jones Myrthong, Secretary Shnong, u Bah Habamut Lyngdoh, President ka Seng Samla, ki Longkmie bad ki paidbah.

Haba iadei bad katei ka jinglah jong katei ka longiing ban ai pynshna sngewbha sha ki paidbah ka shnong, na ka liang u Rangbah Shnong ka Saiden, u la pynpaw ia ka mynsiem jong ka jingkmen halor ka jingkylluid mynsiem jong ka iing ka sem u Bah Evansis Jones Myrthong, namar lyngba katei ka sem ap kali kan da long shisha kaba myntoi ia ki paidbah ka shnong hi baroh kawei.