Ban sted ki surok PMGSY, yn thaw da ka PIU, ong U Mukul

Shillong, 23 Jylliew:
Namar ka jingslem bad ka jingsuki ka sorkar ban pyntrei ia ki projek ba iadei ban shna surok ba pyntreikam na ka PMGSY hapoh ka por ba la buh ha u Naiwieng 2015, na ka liang u Myntri Rangbah u Dr Mukul Sangma u la tyrwa ban thaw ia hynriew tylli ki Project Implementation Units (PIUs) ban pyn sted ia ka jingpyntreikam ia kane ka skhim ba kyrshan pisa ka sorkar kmie.
Nalor ki saw tylli ki unit ba la don lypa, ka jingthaw sa hynriew tylli ki unit kan pynbha bad pynsted ban pyntreikam ia kane ka projek. Ka jingeh ka long ba bun ki Detailed Project Reports (DPRs) ia ki projek babun ha kane ka skhim kin wan shuh shuh” la ong u Dr Mukul.
Katkum ka jingong jong u Myntri Rangbah, ia mynta ki enjiniar kiba buh ha ki PIU ki khia than ka kam bad donkam khambun ban iarap ia ki.
“Namar kane, nga la pan jingmynjur na ka tnad Rural Development ka sorkar pdeng ban thaw sa hynriew tylli ki PIU” la ong u Myntri Rangbah.
Ka thong jong ngi ka long ban pyndep haduh 1625 km ka surok kynthup ki jingkieng haduh u Naiwieng 2015 ha ka PMGSY la ong u heh ka PWD.
Ka Meghalaya ka la ioh jingkyrshan na ka World Bank $ 238 million (T. 1330 klur). Hadu mynta ioh pdiang T. 320 klur na ka bynta T. 373 km bad ha u Naitung yn sa aiti sa kawei ka DPR na ka bynta T. 300 klur.