“Ban sngewthuh ia ka NEICC, peit ia ka Edinburgh 1910” Ka kot thymmai U Pastor JF Jyrwa

Shillong, 15 Risaw:
U Pastor JF Jyrwa, u dan shu pynmih shen, ia ka kot kaba ula ai kyrteng “History lyngkot ka North East India Christian Council”.
Ha katei ka kot, U Pastor, ula kynthoh ha ka jinglamphrang, halor ka jingrakhe ia ka jingdap 75snem jong ka NEICC, ha ki tarik 18-20 Jymmang 2012 ha ka Balang Presbyterian Rymbai, kaba hap ha ka KJP Synod Mihngi, ha kaba u nongthoh, ula kynthoh “nga la ioh lad ban iashim bynta ha ka jing iaseng plie ia kane ka Jubili.”
La ong shuh shuh U Pastor, ba ki don mynta bun ki jait ki Balang kiba la ia snoh lang kum ki dkhot jong ka NEICC bad kitei ki kynthup ia ka Council of Baptist Churches in North East, nangta ka Mizo Synod, kaba dei kawei na kiba kit radbah ia ki kam ka NEICC.
La iathuh shuh shuh da u nongthoh ba ka jingsdang ka NEICC, ka donkam ban ia kynmaw ia ka jingjia ha Edinburgh jong u snem 1910, kaba dei ka jingialang ki mishoneri protestant, kiba mih na la ka ri, ban leit ialap ia ka kospel U Jisu Khrist ha ki 3rd World, kiba dei ka Asia, Africa bad Latin America. Ha kaba la iathuh ba ki don haduh 2,000ngut ki nongmihkhmat na ki mishon bapher, kiba leit ban shim bynta sha katei ka jingialang ha Edinburgh ha u snem 1910.
U nongthoh u iathuh ruh khyndiat halor ka jingmih ki mishoneri, ha ka spah snem kaba 19 ban leit sha ki lyngkha ialap bapher bapher bad katei ka dei ruh, ba ka Welsh Mission, ka la wan trei sha ki lum Khasi, North Cachar Hills, Sylhet (Bangladesh ba mynta).
Halor ki kam jong ka NEICC, la pyni nuksa ia ka jingdon ka Union Christian College, kaba ha Umiam, kaba la sdang ha u snem 1952. Ki don ruh sa kiwei pat ki kam, kiba dei halor ka jingpynkup bor ia ki kynthei, ka jingiasngewthuh jingmut hapdeng ki balang Protestant bad ka balang Roman Catholic bad kiwei kiwei de.
Ia katei ka kot, lah ban ioh na Ri Khasi Book Stall bad kiwei de ki dukan die kot.