Nongpoh: Ka kynhun na ka Meghalaya State Planning Board, kaba la ialam da u Bah Lambor Malngiang kum u Chairman bad u Ma Hopefull Bamon, Co-Chairman lem bad kiwei de ki member hapoh ka MSPB, hynnin ka sngi ki la hiar sha Byrnihat, na ka bynta ban leit ai mynsiem ia ki briew kiba trei ha katei ka jaka bad ha kajuh ruh ka por ban leit jurip ia ka jinglong jingman bad ka rukom treikam hapoh katei ka Covid-19 Screening Centre ha Byrnihat.
Ha katei ka sngi kaba ki heh ka Meghalaya State Planning Board, ki la hiar sha katei ka jaka, la synranlang da ka Kong RM Kurbah, Deputy Commissioner Ri Bhoi, kaba la ioh ruh ban pynshai sha kitei ki heh ka MSPB, halor ka rukom treikam hapoh katei ka Screening Centre ha Byrnihat.
Haba kren sha ki Nongthohkhubor, u Bah Lambor Malngiang, u la ong ba ka jinghiar jurip jong u lem bad ki dkhot sha katei ka jaka, ka long ban leit ai mynsiem ia kiba trei ha katei ka jaka bad ruh ban tip ia ka rukom treikam ha katei ka jaka, kaba peit ia ka jingwan rung ki briew nabar.
U la ong ruh, ba ka dei kaba donkam ia u kum u Chairman ka Meghalaya state planning board ba un hiar jurip dalade sha katei ka Screening Centre ha Byrnihat, namar lada lap ia kino kino ki jingduna, yn lah ban nangpynbha shuh shuh, ka ban pynsuk ia ki ym tang ia kiba trei ha katei ka jaka, hynrei kan long ruh kum kawei na ki mat ban pyrkhing halor ka jingwan ki briew kiba nabar bad khamtam eh ha kaba kum kane ka por jong ka khlam Covid-19.
Ha kawei pat ka liang, utei u MLA ka Nongkrem bad uba dei ruh u Chairman ka MSPB, u la ai ka jingiaroh ia ki bor pyniaid distrik ka Ri Bhoi bad ruh ia kito kiba trei ha katei ka Screening Centre, namar ka jingtrei shitom ka jong ki ban wanrah ia ka shngain na bynta ki paidbah ha ka jylla hi baroh kawei.
Phi don ban ong eiei?