| Dang mynno ngi ioh pule kot khubor ba bitar ka Seng Khihlang ban riam Khasi tynrai kiba lah long Khristan bad kaba sngewtynnad pat ba Ka Niam Khristan ha ri Khasi kam khang ia kiwei pat ki niam kiba pyndonkam da ki dak thoh ba wanrah da ki sahep ka Niam Khristan ban kynthoh ban wohnia wohdong ia ki Khristan da u dak thoh jong ki khristan. Ngam pat ju iohi ruh ha ki kotkhubor ba ka niam khristan ka maham ia ka seng Khihlang ban pynlong lympung ha ka Sngi Blei jong ki Khristan. Ha ka jingshisha haba don ki lympung ne ki jingiaseng heh phin ymtip ne ithuh ki dei ki seng khih lang ne ki dei ki jingiaseng Khristan namar lah long kumjuh naduh ka rukom pyniaid nadong shadong. I don iwei I riew rangbah ba dang bat ia ka niam tynrai I ong kumne mynta lah shu tynneng lut wat ha ka rukom leh niam leh rukom ym ithuh shuh kano ka tynrai bad kano ka tynneng, lah long kumjuh lut baroh. Ki don bun ki jingmyntoi kiba ngim lah ban len kiba wan lang ha ka song jong ka Niam Khristan kiba iarap ban tehsong ia ka jaidbynriew Khasi jongngi bad kita ki dei ki hospital, ki skul, ki dak thoh bad ka jingpynithuh jong ki ia ka Ktien Sohra kum ka ktien kmie jong ka ri Khasi jongngi. Lymda dei na ka jingwanrah jong ki ia ka Ktien Sohra kum ka Ktien pdeng jongngi ki Khasi ngam tip shuh ngin pyndonkam da kiei ki ktien haba U Bhoi u kynduh ia u Khynriam bad u Pnar un pyndonkam da ka ktien aiu haba u iakynduh ia u War? Lane ka Niam Tre kan pyndonkam da kaei ka Ktien haba ki iakynduh lang bad ka Seng Khasi? Ki don ki jingmyntoi kiba ka Niam Khasi Niam Tre ki pdiang sngewbha ia ki jingmyntoi kiba long jingkyrkhu ia ka jaidbynriew jongngi bad kawei na kita ka dei Ki Skul. Ha ki thain Jaintia leilei haba ki kylli ia ka Niam jongphi kin kylli, phi long Skur ne dang long chnong? Kaba mut Skur ne Skul la ithuh ia ki da ki nong Jaintia kum ki Khristan. Lada ngin kyrtiang ia ka mynnor jongngi ki Khasi ngim don satia ki skul rit ne skul bah. Ki Lyngwiar dpei jongki rympei iingkhasi hyndai ki dei ki skul ba hikai ia ka akor bad ka burom. Imat ba ngim ia don dpei shuh la sdang hiar noh ka akor burom, ngi la nang ban wohnia wohdong ia ka jingngeit kiwei. Ngi kloi ban kdew kti ia ka Niam Khristan ba ka ki dei ki jinghikai nongwei katba ngi klet ba kine ki jinghikai nongwei ki ioh rung kluk pynban ha ki Seng Khasi bad Seinraij lyngba ki skul. Kane ka jingthoh kam dei kaba pynrem ne pynksan ia ka Niam Khasi ne Niam Khristan hynrei ka dei ka jingthoh kaba nga kwah ba ngin ia burom kylliang iwei ia iwei ban shim ban pdiang ia kaei ka ban wanrah jingkyrkhu ia ka imlang sahlang bad ban kyntait ia kiei kiei ki ban pynpait pynpra ia ka jaitbynriew jongngi. Sa kawei pat ka khubor kaba ngi ioh pule ba shah jyrwait shkor ka Skul Khristan ha ka iing Kashari namar ba pynduh ia ka hok u nonghikai ba iapoi kha bad ka Balang Katholik. Kane ka Khubor ka saphriang ymtang ha Meghalaya hynrei ka la poi kylleng sawdong ka pyrthei ha kaba kiwei ki kot khubor phareng na kiwei pat ki jaka ruh ki ai jaka lem ha ki sla kotkhubor jongki ia kane ka khubor. Hap pyndem niuhmat ei toin haba ki nongwei ki pule ia kum kine ki khubor ha khmat jongngi ki trai shnong. Ka jingkylli ba ki nongwei ki kylli ka dei, Ia phi ki Khasi lada phi iathoh da ki bymdei Khasi ruh phi shah thad dur ha ki social media bad shah peit khmat ha ki para jait bad lada phi iathoh para Khasi pat ruh phi shah knieh khiewja? Phin hap iathoh badno pat? Ka dei ka jingkylli ba jnang ban jubab shisha. Balei ki mih kum kine ki jingkylli? Namar ka jingsngewniam ha ri Khasi ka jur bha bad ka jingsngew iapher niam kam dei eh tang ka hapdeng ki Niam Khasi ne Niam Tre niam Hindu ne Muslim hynrei wat hadeng para Khristan ruh ka don ka jingia tan tyllai bajur bad ki bun ki longing kiba paid ba pra ymdei namar ba buaid tanglang u kpa ne ka kmie hynrei dei ka jingbuaid niam. Kine kim dei shuh ki jingjia ba dang mih thymmai hynrei ki dei ki jingjia ba lah slem bha. Te hynrei namar ki briew mynta ki lah kham shai kham stad bad ruh ki tip shaphang ka hok jong ki. Mynta kim aps huh ha ka jingisynei ka Managing Committee hynrei tied jingkhang beit ha ki Ingkashari. Imat dei tang ka Ingkashari ba lah ban iarap bad pynsngapjar ia ki nongkhniot kiba pyndonkam bakla ia ka bor jongki. Sa kawei pat ka jingshah khniot bein jong ki para Khasi jongngi ki ban sa paw ka dei lyngba ki rukom synshar shnong da ka niam, ka Balang ne da ka kur. Kine ki rukom synshar shnong ki don shisha ha ki katto katne ki shnong jong ka Ri Khasi jongngi. Ha kaba ka synshar shnong la pyniaid da ka kynhun Balang ne Niam ne kur ba long majority ha kata ka shnong. Angel Mac |