Ban pynshai ia ka VAB ki kyntait, ong U bah Ardent ia ka PDF rPor elekhon, shiteng synnia ruh wan tied iing

Shillong, 21 Jylliew:
U MDC ka Nong krem u bah Ardent M Basaiawmoit u la  ther tyngeh ia ki nongialam ka PDF kiba la kyntait ban mih shakhmat ban pynshai paidbah ia ka Village Administration Bill (VAB) hynnin ka sngi Saitjain ba long ha Stand bus Mawlai.
Ha ka jingshisha hynnin ka sngi ki ar tylli ki seng Mawlai ka FKJGP bad ka KSU, ki la buh ia ka jingiatainai hapdeng ki MDC ka ARPA bad MDC ka PDF kynthup ia u CEM ban pynshai ia ka VAB sha ki paidbah ka shnong Mawlai.
U Bah Ardent uba wan na ka liang ka ARPA, u la ong ka jingiakren jaidbynriew kam dei tang ha Dorbar hynrei lah ban iakren ha dukan, ha surok ne ha iing ha sem la ki paidbah ki donkam.
“Ha ka por elekshon pat ki kyrtong MDC/MLA shiteng synia ruh ki ia wan tied iing hynrei lada donkam ki paidbah ha kum kane ka por ki kyntait da kaba pynksan nia da kaba da rapjot”, la ong u bah Ardent.
“Jin lada ki wan ha kane ka por ngi la ioh ban iatai para rangbah khnang ba u paidbah un ioh ka jingpynshai”, la ong u MDC ka Nongkrem.
“Don lei lei ki kyrtong ha ka por elekshon ka met ki nongiap ka dang syaid hynrei ki la poi ban wan sngew lem”,la ong shuh shuh u bah Ardent.
U la ong ba lada ka VAB ka pynkhein ia ka riti synshar ka ri India ne ka long beain ka mut ba ka ain Land Transfer Act, Trading byn non-tribal, reservation policy Act ruh ka long beain.
“Lada ka jingialap pynshai paidbah jong ngi ia ka VAB ka long beain kem iangi”, la ong u bah Ardent.
U la ther ia ka PDF halor ka jingkynnoh leh politik ia ka ARPA da kaba ong ba leh politik ia ka VAB.
U la ong ha ka Dorbar kyrpang ka KHADC ha ka 30 tarik Jymmang katba ka Dorbar ka dang iaid ki nongialam ka PDF pat ki la phah khubor sop sop da ka sms mobile sha ki nongialam ka synjuk ki Rangbah shnong ha ka por ba long ka Dorbar bah ha katei ka sngi ha madan Polo.
“Hato haba kumne mano ba leh politik, mano ba kwah burom ka ARPA ne ka PDF ne”, la buh jingkylli u bah Ardent. “Sngew synei ia ki paidbah kiba shong tyrsain ha katei ka sngi watla hapdeng u lapbah bad ki la shu thap kti ba la pynbna ba la pas ia ka VAB khlem da tip ia ka jingshisha”, la ong u bah Ardent.
Ha kane ka sngi, ki MDC ka PDF kiba kynthup ia u bah Process T Sawkmie u MDC ka Mawlai, James Sylliang  bad u CEM ka KHADC u bah Pynshngain N Syiem kim shym la wan mih sha kane ka jingiatai nia bad la wan tang ki nongialam na ka liang ka ARPA kynthup u CEM barim bah Adelbert Nongrum, bah Witting Mawsor, u bah Pyniaid Sing Syiem nalor ki nongialam ka KSU bad FKJGP kiba pynlong ia kane ka jingiatai nia.