Ban pynneh dawai kynbat, sam dawai ka SADKS ha Umtrew

Nongpoh, 21 Jymmang:
Shi bynta ban pynsaphriang paidbah halor ka jingdonkam ban pynneh pynsah bad ban sumar ia ki dawai kynbat, hynnin ka sngi ka Sumarlang Ai Dawai Khasi Society (SADKS), ka la pynlong da ka jingialang bad paidbah bad sam symbai dawai kynbat sha kito ki briew kiba don ia ka jingthmu ban pynneh pynsah ia ki dawai kynbat khlaw ha shnong Umtrew Ri Bhoi District.
Ha katei ka sngi ba la pynlong ia katei ka jingsam symbai dawai, la don ryngkat da u Dr. Philling Rynjah, u President ka SADKS bad uba dei ruh uwei na ki Nongsumar Khasi ba la paw bha, u Bah S.A Kurbah Adviser ka SADKS, u Bah J.K Basawiamoit, u Bah J. Mawlong, Rangbah shnnong ka Umtrew lem bad kiwei kiwei.
Haba kren ha katei ka sngi, U Dr. Philling Rynjah, u la ong ba ka daw kaba la pynlong ia u ban sam ia ki symbai dawai sha kito kiba kwah ban thung, ka dei ruh hadien ba kum u Doktor uba la ju sumar ia kiba bun ngut ki briew lyngba ki dawai kynbat, kumta ban pynneh ia kine ki dawai kynbat, la pynlong ia kane ka jingsam ia kitei ki symbai dawai.
Ha katei ka sngi, na ka liang ka Sumarlang Ai Dawai Khasi Society, ka la lah ruh ban sam symbai dawai sha kiba bun ngut ki briew, kaba long ruh kum shibynta ban pynshlur ia ki paidbah ba kin thung bad sumar bha ia kitei ki symbai dawai, khnag ba yn lah ban pyndonkam ha kaba shna dawai bad ban sumar ia ki briew kiba iakynduh ia shibun ki jingpang ba harukom.