Ban pynkiew ia ka jingsiew kam mih satia ia ki ASHA, ong ka myntri

Shillong:Ka Myntri ba khmih ia ka tnat ka Koit ka Khiah ha ka Jylla, ka kong M Ampareen Lyngdoh ka la ong ba ki nongtrei ASHA ki dei ki nongtrei mon sngewbha lane ki volunteer ha ki shnong, bad ka Sorkar ka burom ia kata ka jingtrei ka jong ki da kaba ai ruh ka jingsiew, hynrei ban pynkiew ia ka jingsiew kam mih satia, namar ki ioh ia ki jingsiew bapher bapher.

Haba kren bad ki lad pathai khubor ka la ong ba ha ka jingiakren bad ki ASHA ka la iatai sani bha ia ka jingdawa jong ki, ba kynthup ia ka jingshah sumar pang khlem da donkam siew pisa, bad ka la pyntip ba na ka liang ka Sorkar ka la mynjur ia kane ka jingdawa. Ha kaba iadei bad ka jingdawa ban nym ai bor shuh ia ki dorbar shnong ban rai ia ka jingthung bad weng kam ia ki ASHA, ka la ong ba katkum ka rukom treikam, ki ASHA kidei ban trei haduh 2 snem ym ban trei kijuh shi kijuh ki briew.

Ka la ong ba ka Sorkar ka donkam ia ka jingiatreilang bad ki dorbar shnong namar tang ka Sorkar kam lah ban khmih ia ki jingdonkam jong palat 6000 tylli ki shnong hapoh ka Jylla, da kaba bynrap ba ha ka por ba wan lynshop ka khlam Covid, dei ki dorbar shnong kiba la trei borbah ban pyllait ia ka Jylla na ka jingduh kaba khraw jong ki mynsiem briew.
Ka kong Ampareen ka la kren da kaba shai ba ka Sorkar kam lah ban kular eiei ia ki nongtrei ASHA, ka ban ktah pat ia kiwei ki nongtrei mon sngewbha ha kiwei ki tnat, hynrei ka la kyntu ba ki ASHA kin sangeh noh ka jingiakhih bad trei beit ia ka kam.

Ka Myntri ka Koit ka Khiah ka jylla ka Kong Ampareen Lyngdoh mynta ka sngi ka la ong ba ka Sorkar Jylla kan jied ia ka kompani kaba biang tam ban pyniaid ia ka 108 EMRI hapoh ka Jylla.
Haba iakren bad ki lad pathai khubor, ka Myntri kala ong ba ka sorkar kan ym shah pynbieij ha ka jingpynksan jong kiwei pat kiba thep tender namar ba ka sorkar kan jied ia kaba biang bad kaba bha tam. “Ki jingkynnoh, ki jingiapynksan kan ym lah ban pynbeit iaki jingeh. Ngin jied ia ka kompeni kaba biang bad kaba bha tam”, la ong ka kong Ampareen.

Ka la ong ba ka 108 EMRI kala shah mad ia ki jingtynjuh kiba bun ha ki snem bala leit noh bad kam kwah ban iadon bynta ha kum kine ki kam ka ban ktah ia ka Sorkar.
Ka Myntri ka la kyrpad ia ki kompani ba kin pynbeit ialade ban long adkar bad ban shaniah ha ka sorkar ym ban pynpaw ne kam ialade ha ki lad pathai khubor.