Ban pynheh tulop ia ki shakri sorkar

Shillong, 07 Naitung:
Ka sorkar mynta ka sngi ka la mynjur ban thaw ia ka 5th Pay Commission na ka bynta ban pynheh tulop ia ki shakri sorkar jylla bad ia kane ka Komishon yn khlieh da u Chief Secretary barim ka jylla u PJ Bazely ryngkat ki dkhot ban kynthup ia u Utam K Sangma bad u Bah Lambha Roy kiba dei ki IAS barim.
Haba kren sha ki nongthoh khubor hadien ba la wai ka jingialang, u Myntri Rangbah u Dr Mukul Sangma u la ong ba ka sorkar ka la pdiang ban thaw ia ka Pay Commission kaba ju long shisien ha ka shiphew snem na ka bynta ban pynkiew pynheh tulop ia ki shakri sorkar.
Ha ka jingshisha ka sorkar jylla ka don hapdeng ka jingeh namar ba ka iarong pisa jongka, ka syngit namar ka jingkhang tih dewiong ka NGT bad ka jingpyrkhing pisa ka sorkar pdeng. “Haba pynkiew tulop ka ju long ba ka sorkar kan don beit ka jingeh hynrei kam mut ba kam lah pat. Ka sorkar ka don ki lad ki lynti kiba lah ban leh ia kane watla ka la don ka jingkhang tih dewiong ruh”, la ong u Mukul.   “Ia ka Commission yn sa pynbna noh shen bad ia ka jinglut jingsep bad ka jingdonkam baroh  yn sa tip hadien ba ka sorkar ka la ioh ia ka jingphah na ka Commission”, la ong u Myntri Rangbah bad bynrap ba ha kata ka por, ka sorkar kan sa leh ia kaba donkam.