Ban pynduh khieshoh rih, batai U Phadar ha Iew Umdang

Nongstoiñ, 25 Iaiong:
Ban pynshai paitbah halor kumno ban ialeh pyrshah ia ka jingpang khieshoh rih, ka Nongstoiñ Social Service Society (NSSS) West Khasi Hills District ha ryngkat ka jingiatreilang bad ka District Vector Borne Disease Control Programme (VBDCP) West Khasi Hills District ka la ioh ban rakhe ia ka sngi pyrshah khieshoh rih ha Iew Umdang WKHD.
Ha shwa ban sdang ia katei ka jingialang la ioh shwa ia ka jingia iaid rally ryngkat ka jingpyrta ia ki ia ki kyntien bapher bapher ha kaba la wan ban iashim bynta da ki Community Health Volunteer (CHV), ki khynnah skul na ki skul bapher bapher jong katei ka thaiñ bad kiwei kiwei.
U Fr. James A. Syiemlieh (Director NSSS) haba ai jingkren ha katei ka jingialang u la ong ban ialeh pyrshah ia katei ka jingpang ki paidbah ki dei ban ailad ia ki bor jong ka sorkar kiba wan ban synreit ia ki dawai DTT, bad ki paidbah ki dei ruh ban pyndonkam ia ki musari ban lait na ka jingshah dait ha u kain pyrjong, u la ong ruh ba dei ban kiar na ki jingpynlang um khlem da tap namar ki pyrjong ki lah ban wan kha pylleng ha ki um ki ba ju lang ha man la ki kyndong kynshrot.
Shuh shuh u Fr. James u la ong ruh ba ban ialeh pyrshah ia katei ka jingpang ka sorkar India ka la ioh jingiarap na ka Ri Venezuela bad katei ka jingiarap kan kut noh ha u snem 2030, namar kata katba dang ioh ia ka lad ban ioh ei ia ki dawai dashin bad ia kiwei kiwei ki lad jingiarap ban pynduh jait ia kum katei ka jingpang, dei ban mih paitbah ban wan shakhmat khnang ba ngin lah ban pynduh jait shi ia ka jingpang malaria hapoh ka thain.
Ha katei ka jingialang la iadon lang ruh u Dr. Laster D.Sangma MO shallang PHC, u bah Pynshai Lyngdoh DMO Office, u bah Solindro Shyrkon Secretary Shnong Umdang, bah Risen Mawsor Headman Umdang, ka samla Bestifully Syiemlieh DEO IMCP3 NSSS I bala pyniaid ruh ia katei ka jingialang.
Ha katei ka jingialang la ioh ruh ban pynlong ia ka Street Play Skit (Drama ha surok) na ka Field Supervisor NSSS, bad la ioh ruh ban sam ia ki khusnam sha ka skul kaba la ioh rah ia ka nam nyngkong ha ka jingthoh slogan bad kata kadei ka Rongrin Govt School, ia ka nam ba ar la ioh da ka Don Bosco Secondary School Umdang bad balai da ka Lumdiengjri Presbyterian L.P.School.