Ban ong, ba tang ka Sngi U Blei, ka sngi ba khuid, kam shongnia, ong u bah Paul

Shillong:U myntri ka tnad jngohkai ka jylla, u bah Paul Lyngdoh, u la pyn phai nia ba ka jingpyrshah jong ki katto katne ki kynhun ban pynlong tamasa, ha ka sngi u Blei kam shong nia eiei ruh em.

“Hato kan shongnia ban khang ia ka tamasa, lada ha kajuh ka rukom yn pynshongnia ban khang noh ia ki cinema hall, ia ki restaurant, bad khang noh ia kino kino ki kam sngewbha ba ki paid bah ki leit ha ka sngi u Blei, bad phah ia ki briew ba kin rung sha ing mane?”, la buh jingkylli u bah Paul ia kiba pyrshah.
U Myntri u la ong ruh ba kane kam dei ka sien kaba nyngkong ba ka tamasa lane ka jingiaput iatem la pynlong ha ka sngi u Blei, kine kiba mynta lei kidei kiba ka Sorkar ka thew ban ioh myntoi na ki nongjngohkai na shabar.

U la ong ba ka tamasa Cherry Blossom kam dei ka tamasa kaba buh tarik da ka Sorkar, hynrei ka don da ka kynhun kaba ioh ia ka tender bad ka la buh ruh ia ki sngi ban pynlong ia ka tamasa bad ka ticket la dep die.
“Kane ka dei ka tamasa ban kyntiew ia ka kam jngohkai, namar 90 percent dei ki briew kiba na shabar ka Jylla ki ban wan bad kumjuh na ki ri na sha shiliang duriaw, bad ki 10 percent pat na Meghalaya bad kine ruh baroh kim dei ki Khristan”, la ong u bah Paul.

U la bynrap biang, ba, ban ong pat ba tang ka sngi u Blei ka dei ka sngi ba khuid ba kyntang kam shongnia hano hano ruh, namar ki don ki Balang Seventh Day, ki lah ban ong balei phi pynlong ha ka sngi Saitjain, bad kumjuh ki Muslim ki lah ban ong balei pynlong ha ka sngi Thohdieng, ki lah ban thaw sngi thymmai, kita ki kynhun ba pyrshah.
U Bah Paul u la ong shuh shuh ba ka ka Sorkar kam shym pynbor iano iano, ban wan sha kane ka tamasa, kaba kham khring ka dei ia ki nongjngohkai na shabar namar kidei kine ki ban wan theh pisa, bad ia kine khlem kylli ki long niam aiu aiu ruh.

Ha kawei ka liang u Bah Paul uba dei u nongaiktien ka Sorkar MDA II, u la ong ba ka Sorkar kan peit ban nym ailad ban mih ki jingiakhih, bad bynrap ba ki briew ki don la ka rukom sngew bad mano mano ki lah ban pyrshah ia kano kano, ha kaba u la kynthoh ruh ba u suba ba ka don ka jingleh politic ia kane ka kam bad ki don ki bor ba pyrshang ban pynhiar ia ka kam jngohkai.

Halor ki jingshah kynthoh kiba la mih, u Myntri u ka ong ba ka Sorkar ka dei kaba la jied hi da ki paidbah, hynrei hadien ba ki la dep jied ki sngew ba ki kham stad ma ki, ki kham sngewthuh ma ki, kham iohi jngai ma ki, lada ki sngew ba ki lah haduh katta, te balei kim ialeh election long minister ma ki bad khang ia ki festival.