Ban nym ngam ka titanic JHADC; da ka Co-ordination Committee ka EC,ki MLA

Jowai: U MLA ka Jowai Constituency u ma Wailadmiki Shylla, u la shimkhia naduh kine ki khyndiat bad ban kren ruh hapoh Assembly ha ka jingiadei bad ka jingbymioh tulop shuh ki nongtrei ka JHADC la 8 bnai kynthih mynta.

Myn hynnin ka sngi u ma Wailadmiki, u la pynlong ia ka jingialang kaba kyrpang hapdeng ka (EC), U CEM bad baroh ki dkhot ka Executive Committee ka JHADC na ka bynta ban iakren sani bha halor ki jingeh ka Council, khamtam eh ha kaba iadei bad ka jingduna pisa kat haduh bym lah shuh ban siew wat ia ka tulop jong ki nongtrei kaba la kot haduh kumba 7 klur shiteng ha ka shibnai.

Ka jingheh dor ka tulop ki nongtrei haduh katne ka long na ka daw ba ki Executive Committee ba la ialam da ki riewkhraw (CEM) bapher bapher ka rilum Jaintia kiba la thung kam be-ain bad thurmur tang ban ioh vote ha ka election ban wan khlem da pyrkhat satia ia ka lawei ba phyrnai ka JHADC bad ruh kiba la ai NOC sha ki Company Dewbilat khlem da pyrkhat ia ka jingioh kamai ka JHADC.

Myn hynnin ka sngi da ka jingshimkhia u MLA ka Jowai, u ma Wailadmiki Shylla u la lum ka jingialang hadpeng ki dkhot ka EC – JHADC bad ha kane ka jingialang ki la rai ban pynkhreh  ia ki lad ki lynti kumno ban pynmih pisa lane ban kyntiew ia ka iarong pisa ka JHADC khnang ba kan lah ban ieng hala ki jong ki kjat khlem shaniah shuh na kiwei.

Ka Sorkar jylla ka dang dei ban siew ym duna ia ka 100 klur kaba dei ka bhah ka JHADC, kaba ka sorkar ka la lum na ki khajna mar poh Khyndew kynthup ia u Dewiong, Shyiap, Mawshun bad kiwei kiwei.
 U ma Wailad kumba baroh ki khot ieid, u la ong ba ha kane ka jingialang bad 7 ngut ki MLA, yn sa ia phylliew jingmut halor ki jingeh bapher bapher ka JHADC khamtam ha kaba iadei bad ki nongtrei jong, ka ki bym shym la ioh tulop la 8 bnai mynta.
Ia kane ka jingialang ban phylliew jingmut yn sa pynbeit hadien ba u ma Wailad un ioh ia ka lad ban iakren bad ki 6 ngut ki MLA ka Jaintia Hills kiba kynthup ia 4 ngut kiba long ki Myntri kane ka sorkar hapoh ka jingialam u Conrad K Sangma kum u Chief Minister.