Ban ngeit kam dei ka kam sniew, ong u DGP

Shillong,14 Jymmang:
Ka khubor mane ksuid mynta ka la sa phriang bha ha kine ki sngi ha kylleng ka jylla, ha kaba ki la don ruh kiba la shah kem halor katei ka jingkynnoh bad ruh ba ki bor district ki la phah peit ngor ruh ha ki tnad jong ki ia ka jingdon kitei ki nongmane ksuid.
Ha kaba ia dei bad katei ka phang, haba la kylli na u Director General of Police ka jylla u PJP Haneman u la ong “Ban ngeit kam dei ka kam sniew” hynrei ka ain pat kam shah ban leh ia kino kino ki kam sniew ne ki kam pyntriem kum ka jingknia da ka mynsiem briew.
U DGP u la ong ba haba pyrkhat ba ka dei ka jingmane blei lah ban sngewthuh ruh lyngba ki jingpyrkhat briew jong ngi, ba ka mane blei kam dei kata ban leh khyllah da kumwei pat da ki jingleh ba kynsha.
Haba kynthoh halor ka jingsaphriang ka khubor mane Ksuid u DGP u la ong ba katei ka rukom la ju ioh sngew ha Ri-Sepngi bad ki briew ki la leh bad iaid lyngba hynrei mynta ki la phai  noh sha kawei pat ka lynti, katba ma ngi pat hangne ngi dang sdang ban bud ia kate ka jingleh kaba ki briew ha ri Sepngi ki la phai dien.