Ban maramot ia ki tiar ba sarang, yn khang kali 8 kynta, ha jingkieng Umiam, ong u myntri bor ding

Shillong:U myntri ka tnad bording ka jylla, u Abu Taher Mondal u la ong ba ka jinglong jing man ka jingkieng dam kaba bsa bording ia ka jylla, ka dang tip top, bad ia kane, la lap ki stad na IIT Guwahati, katkum ka kaiphod ka bym pat long pura.

U la iathuh ba hadien ba ki la wan test ia ka jingkieng, ki la phah ia ka kaiphod bym pat biang, ba ka jingkieng ka dang biang bad ka kaiphod kaba pura kin sap hah hadien. Hynrei ki la ong ba ka donkam ban maramot ia ki bearing jong ka jingkieng, ha kaba ka sorkar ka dang thied ia ki nabar.
“Ka jinglong ka jingkieng ka dang biang katkum ka jinglap ka test jong ki stad ka IIT Guwahati bad kiba donkam ka long tang ban shu bujli ia ki bearing”, la ong u Mondal.

U la iathuh ba la thaw ia ka Joint Committee hapdeng ki karikor ka PWD bad ka MeECL ban pule bad bishar bniah bad yn sa rah wat sha ka kynhun myntri ban iathir.
Ban bujli ia ki tiar ba la sarang ha jingkieng, yn pynsangeh ban iaid kali kumba 8 kynta bad hadien kane, yn shah tang ia ki kali bym kit jingkit.

“Ha ka por ba maramot ban bujli ia ki bearing, yn khang ban iaid kali 8 kynta bad hadien, yn sa pyllait tang ia ki kali sting haduh ban da dep ban shna”, u la ong.