Shillong:”Ka Sorkar ka kwah ban shim khia bha ha kaba ïadei bad ki surok kiba lah ban pynduna ïa ka jing khapngiah ne dheng kali bad shen ngin sa khot jingïalang bad ka cantontment board Shillong ha kaba ïadei bad ki surok ne ki link road,” ong u symbud Myntri Rangbah ka jylla u bah Prestone Tynsong u ba peit ruh ïa ka tnat PWD (roads) haba kren kum u kongsan ha shwa ban plie ïa u mawnongrim ha Oxford kenches trace Laban myn sngi saitjain.
U la ong ruh ba ka Sorkar pdeng kan ïarap ïa ka jylla ha kaba ïadei bad ki kam surok.
“Ban pynduna ka jingkhapngiah na Anjali petrol pump yn sa ïoh ka bye pass bad ïa ka jingmang pisa shen yn sa ïoh bad ka Sorkar ka kwah ban pynbhabriew ïa ka nongbah,” ong u Bah Prestone Tynsong.
U la ïaroh ruh halor ka jingïalong kawei jong ki paidbah ka constituency, hynrei ka donkam ka jingïatreilang jong baroh ban lah pyndep ïa ka jingshna ïa ka surok naba kane kan ïarap pynduna ka jingkhapngiah ne dheng kali kumba 35%.
“Ngan pynthikna ba ïa kane ka surok yn lah ban pyndep hapoh ka 18 bnai kumba la buh da ka tnat namar u kontraktor u ba ngi aiti ban pyntrei ïa ka kam u dei u ba biang bad tang hapdeng ar ne lai sngi yn sdang noh ka kam,” ong u Bah Tynsong da kaba bynrap ruh ba lada baroh ki 60 ngut ki MLA kim lah ban wanrah ki kam pynroi ka jylla Meghalaya kan pulom ki kam bad lada don kiba ong bym donkam MLA ki la leh pyrshah ïa ka riti synshar ka ri.
Katba u MLA ka 19 South Shillong Constituency u Bah Sanbor Shullai u la ong ba ka jingmang pisa ïa ka jingshna ïa ka surok ka long T. 4.35, 56 klur bad yn pyndep hapoh ka 18 bnai ha kaba kumba 8 tylli ki dorbar shnong kin ïoh jingmyntoi.
“Naduh ki por ba nga long MDC nga la ïoh bun ki jingthoh jingkyrpad halor ka jingdonkam ban pynduna ka dheng kali khamtam na Ka bynta ki khynnah skul bad kumjuh ruh kiba ju leit sha Guwahati. Nga ai khublei ïa ki tnat bapher bapher kiba la ïarap halor kane ka bynta bad kumjuh ruh ïa ka Sorkar MDA, kynthup ruh ïa ki ophisar PWD kiba lah ïarap halor kane ka surok,” ong u Bah Sanbor.
Ïa ka jingïalang lah pynïaid da u Rangbah Shnong ha ka jingïadonlang u MDC barim u Bah Ricky Shullai bad kiwei ki heh Engineer ka PWD, ki seng longkmie bad ki paidbah ka shnong.
Phi don ban ong eiei?