Ban khang long rangbah shnong ia ki nongtrei ophis, dei ka mat ka Congress?

Shillong, 17 ‘lyngkot:
Ha u snem 2014, ha ka por ba ka jingiakhih Inner Line Permit ka jur bha ha ka Jylla, u myntri rangbah, Mukul Sangma, ha katei ka por, ula kyrngah ban pynurlong ia katei ka jingdawa jong ki 13 tylli ki sengbhalang, halor ka nongrim, ba kam dei satia, ka mat ilekshon, kaba ka Congress, ka leit sha ki paidbah ha ka elekshon 2013 bad ula pynsngew ba ka sorkar Congress, ka kwah ban iaid da kiwei pat ki lad ki lynti ban khanglad ia ka jingtuid jong ki briew kiba nabar bad kaba dang sah kut dheng haduh ha kine ki sngi.
Mynta pat, haba u myntri rangbah, u pynmih ia ka hukum ban khang ia ki nongtrei [bteng sla 7]
ophis, ba kin long Rangbah Shnong bad nangta haba u thaw da kawei pat ka ain ban teh lakam ia ki Rangbah Shnong, (kaba la leh ha ki khyndiat bnai mynshwa) bad kaba iaid lait ia ki District Council, ka mih ka jingiakren ha kine ki sngi, ha ki riew shemphang jong ka Jylla, ba imat katei ka jingleh jong u myntri rangbah, ka dei pleng ka buit jong ka Congress, ban pynduh pyndam noh ia ki District Council lane ban pynjem toin ia ka bor jong ki Rangbah Shnong ha Ri Khasi Jaintia.
Kiba bun ki riew Rangbah, kiba u nongthoh khubor, u iakren, ki lyngngoh ia ka jingsngap jar jong ki nongialam Congress, ba kynthup ruh ia u nongialam jong ka MPCC, U bah DD Lapang, halor ki ain ki kanun, ba la rai da kane ka sorkar jong U Mukul Sangma bad kitei ki riew rangbah, ki pynsngew namarkata, ba u myntri rangbah, un nym nud ban shim ia kitei ki ain kiba eh bad kiba khia tang marwei shi khlieh, lymda u ioh ia ka jingmynjur lang jong ka seng Congress hi baroh kawei.