Ban jyrngam mariang, ia kynduh ki stad German ia u Mukul

Shillong,25Naitung:
Ka kynhun jong ki riew shemphang bad ki stad saian na Germany ki la wan ban iuh kjat mynta ka sngi ha Nongbah Shil long ban ia kynduh ia u Myntri Rangbah ka jylla u Dr.Mukul Sangma ban ia kren kumno ban pyn jyrngam mariang lyngba ki juk stad mynta.
Ka kynhun na German kaba la ialam da ka Dr Utta Bolhoef, na ka German Development Cooperation ki la wan sha kane ka jylla ban ai jingmut ia ki buit bad ki lad ban pyntrei ha ki bun rukom ban wanrah biang ia ka jingjyrngam ka mariang, kaba la sdang ban tlor noh hak kane ka jylla kaba la tip kum ka nongbah kaba jyrngam.
Haba kren sha ki lad pathai khubor hadien ba la wai ka jingialang jong ki, u Dr.Mukul Sangma u la ong ba ka GDC kan long ka paralok ka ban ia treilang bad ka Meghalaya bad ka ban ialam lynti ban kyrshan da ki buit bad ki lad ha kane ka jingkylla ka mariang ha ka jylla kaba la ktah ia ka jylla.
Ka Dr.Bolhoef ka la ong ba ka sorkar jylla ka donkam ka dei ban pyntreikam noh da ka buit stad thymmai bad ban ia syllok bad ki jylla ba marjan ka Thain Shatei Lam Mihngi. “Ka Meghalaya ka la donkam shisha ban pynbna paidbah ia ka mat kaba donkam ban iada bad pynneh pynsah ia ka mariang” ong ka Bolhoef.