Shillong:U Myntri Rangbah ka Jylla Conrad K Sangma, ha ka sngi Nyngkong, ula ong ba ka jingwanrah ïa ka rel kit mar (goods train) kan long kaba jingmyntoi kaba khraw bha ïa ki paid nongrep bad ki nongshong shnong ka Jylla.
U Myntri Rangbah ula kren ïa kane sha ki nongthoh khubor hadien ka jingplie paidbah ïa ka Farmers’ Parliament kaba 3, kaba la pynlong ha State Convention Centre.
U Conrad ula ong ba ka Sorkar Jylla ka dang ïakren beit bad ka Sorkar India halor kane ka kam bad ruh bad ki kynhun bapher bapher ka Jylla. Ula ong ba ki dang don ki jingsngewkhia hangne hangtai bad kumta, ka Sorkar kam shym la lah ban buh ïa ka jingtyrwa ha kaban wanrah ïa ka rel kit mar.
“Ka rel kit mar hi ka dei kaei kaei kaba ai jingmyntoi. Kan ïarap bha ïa ki nongrep bad ïa ka imlang sahlang ha kiba bun ki liang bad ka dei ruh kaei kaei kaba ngi ruh ngi la kyrshan bad la ïakren bad ka Sorkar India hynrei ngi dang don pat ki jingsngewkhia jong kiba bun balang,” ula ong.
U Myntri Rangbah ula ïai ban ba ka Sorkar ka kwah ban pynbeit noh ïa baroh kine ki jingsngewkhia bad kam don jingthmu ruh ban shu leh da ka bor halor kane ka kam.
“Nga la kren da kaba shai naduh kaba sdang ba tad haduh ba ngin da lah pynbeit shuwa ïa ki jingsngewkhia jong kiba bun, ngin ym leh satia da ka bor ïa kaei kaei ruh namar hooid ka roi ka san ka donkam hynrei ka dei ban long ka roi ka san kaba pdiang da baroh bad ngin shim ïa ka jingsngew jong baroh bad ngin sa ïakren bad ki kynhun bapher bapher bad ngin sa peit ruh kumno ba ngin jam shakhmat,” ula ong.
Haba pynpaw ba kane ka dei ka sngi bala ai kyrpang ïa ki nongrep ka Jylla, u Conrad ula ong, “Ka (Parliament) dei kaba la leh namar ngi sngew ba ka long kaba donkam ban pynleit jingmut kyrpang da kaba ithuh ïa ki, ai mynsiem ïa ki, kyrshan ïa ki, ïabat kti lang bad ki bad ban wanrah ruh ïa ki prokram bapher bapher, ki mission mode prokram, ki jingïarap song pisa, ki jingai jinghikai bapher bapher bad ka jingwanrah ïa ki kor treikam bapher bapher. Katba kine baroh kila urlong, ngi sngew ba ngi donkam ban buh kyrpang ïa kawei ka sngi na ka bynta ki nongrep ha ka dur jong ka “Farmer’s Day, ha ka dur jong ka Farmers’ Parliament”.
Ula ong ba ka dei ka sngi jong ka kabu ïa ki nongrep ban wanrah ïa ki jingpynsngew bapher bapher, ki jingeh ba ki ïakynduh bad ha kajuh ka por ka dei ruh ka rynsan ha kaba ki nongrep ki ïoh ban ïakren kumno ban lah pynjanai ïa ka rep ka riang hadien habud bad kiwei kiwei.
Haba kylli, u Conrad ula ong, ” Ki don shibun ki lad ban ïarap ïa ki nongrep. Ngan shu ïathuh khyndiat eh ïa phi ba nalor ki Regulated market, ngi lah wanrah ruh ïa shibun ki Farmers Market. Mynta ngi la pynïeng ïa ki Farmers Market ha kylleng ki jaka ha kaba plie lad ïa ki nongrep ba kin thaw ïa la ki Association bad ban pynïaid ïa kine ki ïew ha la ki jong ki kyndon khnang ba yn ym don mano mano ruh kiba lah ban wan shim kabu”.
Phi don ban ong eiei?