Ban iatreilang bad ka seng, pyniasoh RBYF ki longkmie ha Byrnihat

Nongpoh: Da ka jingthmu ban wanrah ia ka bha ka miat ha ki shnong ki thaw bad ba kumno ban iatreilang bad ka seng, ki la don shibun ki longkmie na ki shnong bapher bapher ka thain Byrnihat, hynnin ka sngi saitjain, ki la leit ban pyniasoh noh ialade sha ka RBYF bad lyngba katei ka jingwan pyniasoh ki longkmie, ka RBYF Sengkmie, ka la pynkhna shnat treikam ba thymmai na bynta ki longkmie bad kaba la tip kum ka RBYF Women Wings Byrnihat Circle.

Ha katei ka sngi, ba kitei ki longkmie ki la rung sha ka RBYF, la wan ban pynskhem ia ki da u Bah R.J Thangkhiew, Political Secretary ka RBYF Sengkmie, ha ryngkat ka jingdon u Bah Vigyan Kharkongor, President ka RBYF Byrnihat Circle lem bad kiwei ki riew rangbah ka thain Byrnihat.

Lyngba jong katei hi ka sngi, la ioh ban jied ia ki nongkitkam ka RBYF Women Wings Byrnihat Circle, ha kaba la jied ia ka Kong Twassibon Lapang, ba kan long kum ka President, ka Kong Maryrose kum ka General Secretary, ka Kong Barisha Lapang kum ka Vice-President lem bad kiwei, kiba long kum ki dkhot hapoh katei ka Circle.