Ban iaid beit ki Bill na KHADC sha ophis u Lat, 1 tarik yn kynduh biang ka Seng Kur ia u Lat

Shillong: Khnang ba ki Bill ba la mynjur da ka KHADC kin iaid beit sak sha ophis u Lat ka jylla khlem da iaid lyngba ka sorkar jylla, u Lat ka jylla mynta ka sngi u la khot biang ia ki nongialam ka Synjuk Ki Rangbah Kur ka Hynniewtrep ha ka 1 tarik Lber ban pynbiang ia ki jingthoh halor kane.

                Haba pyntip ia kane hadien ba la iakynduh ia u Lat ka jylla mynta ka sngi, u President ka Synjuk Ki Rangbah Kur ka Hynniewtrep u bah HS Shylla uba long ruh u CEM ka KHADC, u la iathuh ba ka jingwan iakynduh jongki ia u Lat ka long beit ban kyntu ban ai noh ia ka jingmynjur ia ka Clan Administration Bill kaba la dep mynjur da ka dorbar ka KHADC.

                 “Ka don kawei ka jingeh ba ka ophis u Lat ha kane ka taiew ba la dep, ka la pynphai sha ka District Council Affairs (DCA) bad ngi la iakren ba dei ban submit beit sha ka ophis u Lat, ym dei ban ai sha ka DCA bad u Lat u la ong ban kham kloi ki kam, ka bha ban ai sha ka DCA hynrei ngi la pyni ba don bun ki bill kiba shu sahkut ha Secretariat bun snem khlem poi sha u Lat bad ngim kwah ba kan jia kumba long mynshwa”, la ong u bah Shylla.

                “U Lat u la ai jingmut ban wan ai biang ia ka jingthoh ha ka 1 tarik Lber sha u halor kane”, la bynrap u bah Shylla.

                U Bah Shylla u la ong ba ki Bill ka district council dei ban wan beit sha u Lat kumba kren ha ka Para 3 bad 10 ka 6th Scheduled. “Ki don ki bill kiba sahkut 12 snem ha Secretariat tang namar ba iapher ki party ba synshar ha ka sorkar jylla bad ha district council. Haba ka party kaba synshar district council kam dei bad ka sorkar jylla, ki bill ki sahkut bun snem”, la ong bah Shylla.

                U la iathuh ba ka jingwan iakynduh jongki ia u Lat,  ban ai ka dorkhas halor ka Clan Administration Bill, ha kaba ka KHADC ka kwah ban rejister baroh ki jait kur kiba don 5 hajar tam namar ba haduh mynta ki don tang khyndiat ki kur kiba don ha seng kur.

                “Ngi kwah ia u Lat ba un shim kyrpang ia kane ka Bill khnang ban sted ia ki Kur ban seng ia ki seng Kur namar ba ki kur ki dang long lymbrum haduh mynta bad ki donkam ban don ki seng kur ban long ka jaitbynriew kaba beit bad kaba ryntih ban peit ia ka bha ka miat jong ka jaitbynriew jong ngi”, u la ong.

                U Bah Shylla u la ong ba u Lat u sngewthuh bha ia ka jinglong kum ka jaitbynriew bad u kular ban shim khia ia kane ka kam.

                Halor ka jingpyrshah ka Joint Committee Dorbar Kur ba don ki jingdkoh ha ka Bill, u Bah Shylla u la ong ba ki don ki briew kiba kynriang jingmut kiba kwah ban pynslem ia kine kiei kiei  hynrei yn iaid beit shakhmat bad ki paidbah ki la tip ia ka Clan Bill. “Ngi la ai kopi ruh ia ki ha KHADC hynrei kim ai jingthoh eiei hynrei ki shu kwah ban woh kjat bad ngim don bor ban sngap ia kiba shu kwah ban wohdaw. Kane ka dei kaba donkam kyrkieh ki kur ki dei ban ai ka clan certificate namar ba la laitluid ki briew ban pynkylla kur Khasi kum u Thapa u leh affidavit u kylla Thabah, ka Kashari kam lah ban ai certificate ia ka jait hynrei dei ka kur kaba lah ban leh ia kane. Kiba wohnia kim iohi ia ka jingjot bad ka jingma ba ka jaitbynriew ka la iakhun haduh kine ki sngi”, u la ong.