Ban ia ktaid ia kajuh, ka pynhiar kyrdan iangi kum ki sniang, ong U Bah Shylla ia ki HSPDP

Shillong, 20 Naitung:
U bah HS Shylla Adviser jong ka UDP Nongkrem Circle u la ai khublei ia ka jingkloi ka HSPDP ban pdiang ia katei ka jingtyrwa iatai jong u halor ki san tylli ki mat kiba ktah ym tang ia u paidbah ka Nongkrem konstitwensi hynrei ia ka ri baroh kawei. “Kane kan sa long ka sien jam kaba nyngkong ha kaba ki paidbah kin ioh ban tip katno ka long kaba donkam ba ki nongmihkhmat paidbah ki dei ban  long kiba da tip shai kdar ia ki kyndon jong ka ain bad ba ka jingiatai nia halor ki kyndon jong ka ain ba ka long kaba pynmih ia ka jingshai ym ia ka jingkhluit” ong u bah Shylla ha ka kyrwoh khubor.
Ha katei ka jingiatai u bah Shylla u la ong ba ki paidbah kin sa shai kdar bad ka jingiakwang ktieh ruh kan kut noh bad yn pynkut ruh ia ka jingiakhyllie syrtap ia kiei kiei kiba la dep. “Ha ka jingiatai ia pyni nia kaba shisha bad kaba tei yn sa nangsain dur ia ka synshar khaddar kaba u paidbah ruh un da pdiang suk  mynsiem bad burom ia ka ain. Ynda kum ka jaidbynriew ngi la nang la lah ban niewkor ia kane ka lynti ba ha ki por ki ban sa wan ba ngin sa iohi ba ki riewshemphang, ki briew kiba don ia ka jingtip, jinglah ban long ki nongsynshar kin sa nud ban mih pyrthei, kata, ia kaba mynta kiba kum kita ki briew wat ki la  don hapdeng ka jaidbynriew jong ngi hynrei kim nud ban mih shakhmat namar kim don lak don klur ban theh ha ki por elekshon. Ai namarkata ba kane ka jingiatai jong nga bad u bah Ardent, MLA kan long kaba jop, kata, ha kaba plie wang ia ka jingmut jingpyrkhat jong u paidbah ha kaba kein noh ia  kiei kiei jong ka badum hynrei ban iohi ia ka lawei baphyrnai lyngba ka jingkdew ia ka jingduna bad jingtam jong ki kyndon ain da ka lynti kaba don burom” ong biang ka kyrwoh
U bah Shylla u la ong ba un thoh sha baroh ki sordar shnong jong ka Nongkrem konstitwensi ba kin shong pyrkhat na ka bynta ki jingdonkam baroh kiba ia dei bad katei ka jingiatai. “Ma nga bad I Bah Arden M. Basaiawmoit, MLA, ngin ieh ha ka jingstad jong ki kumno kin pynbeit ia kane ka kam” u la ong.  Halor ka jingpynkynmaw ia ki sniang u la ong ba u la dep ai ia ka  jingpynshai kaba bniah naduh phra snem mynshwa, kata, ba ka jingshisha kam dei kumba la kynnoh,bad u la ong ba ban ia ktaid biang ia ka juh kan pynhiar kyrdan ia baroh kum ki sniang kyrsum ktieh. “Ngin ym phai shuh shadien hynrei shakhmat katba ngi dang don por ban ai ia ka jingshakri kaba bha tam ia la ka Ri bad ka Jaidbynriew baieit jong ngi” pynkut ka kyrwoh na u bah Shylla.