Shillong: U bah Prestone Tynsong, symbud myntri rangbah ka jylla u la ong ba ha kaba iadei bad ka election, ym tang ha ka jylla Meghalaya, hynrei ha ka Ri hi baroh kawei, ka long kaba eh ban pyrkhing ia ka jingwan shim bynta ki briew.
Haba ia kren bad ki lad pathai khubor, ka jingpyrkhing ia ki protocol, ka dei tang haba don ka lehniam katba ha ka por ba don ka jingialap election kam don jingpyrkhing.
U bah Tynsong u la ong ba ka jingialap election ka dei ka ba la sdang la lai taiew bad ki dei ki prokram ki ba la pynbeit lupa. U la ong ruh ba ha ka por ba ia lap election ka dei ka jingialang paidbah kaba katno ngut kin wan ban shim bynta ruh yn ym lah ban tip, kumta ban bud ia ki protocol ba la pynmih da ka tnad ka koit ka khiah, kam long kaba suk. U la ong ruh ba khlem da tip ia ka jingshisha ban shu ia kynthoh kam long kaba bha.
U bah Tynsong, u la pynshai ruh ba ha ka ba iadei bad ki jinglehniam ki dei ki program kiba la tip lupa katno ngut ki briew kin wan ban shimbynta bad dei na kane ka daw ba ka sorkar ka bthah ba kin pyrkhing ia ka jingwan shim bynta ki briew.
“Hynrei haba iadei bad ka jingialap election ym tang ha ka jylla Meghalaya, hynrei ha ka ri hi baroh kawei ban pyrkhing ia ka jingwan ki briew ngim lah” u la ong.
U bah Prestone Tynsong u ba long u Symbud myntri rang bah ka jylla bad u MLA na ka party NPP, u la pynpaw ka jingkyrmen ba ka party NPP da kumno kumno ruh 18 seat kan jop ha kane ka election GHADC.
Haba iakren bad ki lad pathai khubor u bah Prestone u la ong “Ngi kyrmen ba ka Party NPP da kumno kumno ruh kan lah ban jop 18 seat ha kane ka MDC election ha GHADC.”
Mynta ka sngi la dep ban pyndep ia ka jingiathep vote ban jied ia ki 29 ngut ki MDC na ka bynta ka Garo Hills Autonomous District Council (GHADC).
Kum ban shu pynkynmaw ba ki seng sain pyrthei kiba la pynieng kyrtong ha kane ka MDC elekshon sha ka iing dorbar jong ka GHADC, ki long ka party Congress 29 ngut, ka NPP 29 ngut, BJP 21, NCP, ka UDP 18 ngut bad ki kyrtong shimet.
Ko tongsong ka don jingiapher aiu ha ing mane bad haba ialap election, hato uta u Corona u wan tang haba don ka jingiaseng, katba ha phi te tang ba iohnong ia lade biang beit.