Bam smai u Lat shipor ka Meghalaya

Shillong, 29’lyngkot:
U Lat ka jylla Assam u Banwarilal Purohit, u la bam smai kum u Lat ba shipor ka jylla ha ka janmiet sngi saitjaiñ jogn ka taiew. La pynbam smai ia u Purohit da u Chief Justice ka Meghalaya High Court u Justice Dinesh Maheshwari bad ha katei ka jingialang bam smai la donlang u Myntri Rangbah ka jylla u Dr Mukul Sangma, u Symbud Myntri Rangbah ka jylla u Prof RC Laloo, u Myntri kam pohiing u bah HDR Lyngdoh bad kiwei kiwei ki heh ophisar bad ki heh shipai.
Ka jingwan shimti u Lat ka jylla Assam kum u Lat ka Meghalaya ka dei hadien ba u President ka ri u Pranab Mukherjee u la pdiang ia ka shithi risain jong u V.Shanmuganathan hadien ba la mih ki jingkynnoh pyrshah ia u.
Haba kren ha katei ka sngi u Purohit u la ong “Nga dang shu dep shimti kum u Lat, ngan ialeh katba lah khamtam haba nga don tang ia kawei ka thong katta ka long ban kyntiew ia ka jylla Meghalaya ha baroh ki liang”.
Um kwah ban kren eiei halor ki jingkynnoh pyrshah ia u Lat barim u Shanmuganathan hynrei u la ong ba ka aiñ kan sa leh ia kaba donkam.