Bam smai ki kyrtong ka KHNAM shwa ban leit sha ka elekshon

Shillong, 11 Rymphang:
Ki kyrtong jong ka Khun Hynniewtrep National Awakening Movement (KHNAM) ki la pynlong ia ka jingialang bamsmai hynne ka sngi hakhmat u mot jong u Tirot Sing ha phyllaw ka State Central Library shwa ban leit sha ka elekshon.
Ka party ka la pyn long ia kane ka jingialang ban kyntu ia ki kyrtong ban bat ia ka juban wat hadien ba la jop ia ka elekshon MDC ban shakri hok ia ka jaitbynriew.
“Ngi tip ba ka don ka ain bym khang lad ban kyntiap seng ha ka district council. Ka jingbym don ka ain, ka la ailad ia ki MDC ban ryngkoh dieng kpet hadien ka elekshon”, la ong u president ka KHNAM u Bah Pyndap borthiaw Saibon uban iakhun na Shella constituency ha kane ka jingbam smai.
U la ong ba ka party ka kwah ba ki kyrtong hadien ba la jop ia ka elekshon ba kin neh beit ha ka party khlem leit shawei pat ban shah thied ha ka bor jong ka pisa ne ban die noh ia ka nongrim.
“Kane ka jingialang kan iarap ban kyrisew thiah ia ka mynsiem ba ki la shim ia ka jingkular hakhmat ka dur mot jong u khlawait ka jaitbynriew, ba kin nym iapein ia ki nongrim jong ka jaitbynriew”, la ong u Bah Saibon.
“Ngin bteng ban buddien ia ki mat ba ka party kan trei na ka bynta ka Council. Ngim nym pynlehrain ia ki briew kiba jied ia ngi”, la ong u president ka KHNAM.
Shwa ia kane, ki kyrtong jong ka KHNAM ki la buh syntiew ruh hakhmat u dur mot jong u Kiang Nangbah.