Bam shngiam ka ding, khlad ar ki hep rit

Shillong: Ha kawei ka jingjia pluh iing kaba sngewsih bha kaba la jia ha ka shnong Ummulong ha ka sngi u Blei kata ka 21 tarik u bnai Naiwieng 2021, ha ka por shiteng sngi eiei ha kaba arngut ki heprit ki la duh noh ia la ka jong ka jingim hadien ba ka ding kaba klang bha ka la bam duh ia ka iing kaba ki shong ki sah.

Kitei ki arngut ki heprit kiba la ngat ha kane ka apot ki dei kiba dang don ha ka rta kaba 5 snem bad 2 snem bad baroh ar ngut ki dei ki shyn rang. Katkum ki khu bor ba la ioh lum la iathuh ba katei ka jingjia ka la jia ha ka por ba ka kmie jong kitei ki heprit ia kaba la tip kyrteng kum ka Man Challam ka dang leit saitjaiñ.

Katei ka iing ka don ha ka jaka kaba la tip kum ka Wah Kyndiah bad ym don satia ki marjan marpa kiba sah marjan bad katei ka iing hynrei kiba bun ki iing ki sah kham pajih kaba la pynlong ia ki briew kiba shong ba sah ha katei ka jaka ba kin iohi ia katei ka jingbam duh ka ding ia katei iing ynda la dier ka por.

Na ka liang ki pulit pynlip ding bad ki pulit ka shnong Ummulong ki la poi mar mar sha katei ka jaka bad shem ba ki thylliej ding ki la bam lut ia ki jingdon jingem baroh kiba don hapoh katei ka iing haduh ban da kylla dpei.