Bam sap u Sirdar ka Dwara Nongtyrnem T. 2 klur, lap ka KSU

Shillong, 05 Nailar:
Ka KSU Thyllaw Border Unit ka la kam ba ka lap lyngba ka jingtip da ka ain wad jingtip paid bah, ba u Sirdar ka Hima Hima Dwara Nongtyrnem u la pyndonkam bakla ia ka pisa kumba T. 2 klur duna eiei.
Ha ka kyrwoh ba la pynlait khubor ha kane ka sngi Balang, u Bah Markos Jeengaph u Public City Secretary ka KSU Thyllaw Unit Border u la ong ba ka pisa jong ka Hima kaba dei ia ka jingsiew bai khyndew ban ker sainar kaba la shna da ka NBCC la shu ai kyr teng ha ki briew jong ka Hima ban ioh sei ia ka pisa kaba kot shaduh T. 1,95,68,309tyngka. Hynrei ia kane ka pisa baroh la sei da une u Sirdar jong ka Hima, u Bah Arwanphai Wanshnong bad u khlem wan rah lut ia ka pisa hapoh ka Hima bad u la wanrah pat tang T. 20,00000 tyngka ha ka dorbar kaba long ha ka shnong Nongrim.
U Bah Jeengaph u la ong haba wanrah ia kane ka pisa ha ka dorbar Hima T.20,00000 tyngka,  ki paidbah jong ka Hima baroh kawei ki ia ong ba ym don shuh kat une u Sirdar, hynrei haba lap lyngba ka RTI ba la leh da ka seng la shem ba une u Sirdar u wanrah tang ban shu pynthame pisa ia ki paidbah jong ka Hima.
Ka jingkylli kaba mih mynta shaei ka jah ka T. 1,75,68000 tyngka? kane ka long ka jingshaiong ngain ia ka Hima hi baroh kawei bad balei um shym wanrah ha ka Dorbar Hima ia ka pisa baroh”, la ong u Bah Jeengaph.
Halor kane ka seng ka ka iawer ia u paidbah jong ka Hima Dwara ban kyrshan ia ka seng KSU Thyllaw Border Unit ban rat dyngkhong ia ka jingbamsap bad ha kajuh ka por ban dawa na utei u Sirdar ba u dei ban ai jingkhein sha u paidbah bad ban pynphai lut ia baroh ka pisa kaba dei hok jong ka Hima, lym kumta ka seng kan leh da kaba tyngeh.
U la ong ba ka seng kan nym shongthait hynrei kan iai buddien da ia kiwei pat ki bynta kiba iahap ha ka imlang sahlang bad ka kyntu jur ia ki paidbah jong ka Hima hapoh ki san kyntoit bad ki khun jong ka Hima kiba don ha sor bad ha khap sor ba dei ban bishar bha ia kane ka jingleh jong u Sirdar ka Hima Dwara uba ngi ju khot u Bahdit, la pynkut ka kyrwoh na u Bah Jeengaph.