Shillong:Haba ban than ki jingeh bad ki jingjynjar ha ka jingim bunsien ngi klet noh ia kita ki jingeh baroh, hynrei ngi thom beit ia ka raieh raidam ruh tang ban bsa ban btiah ha iing hasem.
Baroh ngi sngewthuh ba lada ngi iaid lyngba ka Marten kaba don ha Mawlai Mawiong katno ka jingsma iwtung ka long kaba shyrkhei haduh katta katta hynrei ki nongtrei kiba trei hapoh katei ka Marten ki la pynpaw ba kim don kano kano ka jingsma namar ba ki la mlien bad ba ki la trei ha katei ka jaka mynta la bun bun snem.
Kawei ka longkmie kaba trei hapoh katei ka Marten ka la iathuh ba ka la trei hangtei mynta la kumba 23 snem eiei bad ka la iathuh ruh kane ka kam ka la pynim ia ka bad ia ka iing ka sem jong ka bad na kane ka kam ka la ioh ruh ban phah skul ia ki khun ki kti jong ka bad ban pyndap ruh ia ka iing ka sem jong ka. Ka la iathuh ruh ba ha ki por mynshwa ba dang sdang trei ia ka kam te ka shait iohsngew hi ia ka jingsma hynrei mynta pat ka la long myllen noh kumto bad kam da sma than shuh bad ka la ong ruh ba da poi hangtei ruh thgang bad sliang sha pynbna bad ha ka por ba bam ja ruh poi bam shibun shibun bad shiphang shiphang ym kum haiing ban rung ja tang khyndiat. Ka la iathuh ruh ba naduh ba ka trei hangtei kam ju ioh pang hi re kino kino ki jingpang ki ban poi shaduh sha hospital lait noh sa tang ki jingpang ba malu mala.
Katei ka longkmie ka la ong ba don ki sngi ba biang ka kamai bad don ki sngi pat ba ka duna ka kamai bad ka la ong ruh ba ki paralok jong ka kiba iatreilang kajuh ka kam ha katei ka jaka kim ju iohpang satia haduh ban da poi sha hospital hynrei baroh ki ia khlaiñ lut kumba long ma ka.
ka jingkhublei bad ka jingiaroh kaba kyrpang na ka byta kine ki ba trei ha marten. ngim ju iohsngew ba ki khnium ne ud. ki trei hok la ka kam bad kim don jingdawa ei ei ruh. ki hun. ki ioh ia ka jingkyrkhu jong U Trai kynrad.