Bam klop ka kynhun u Manas T.1 klur shiteng, ong ka Greater Laban

Shillong,22 Nailar:
Ka Greater Laban Community Development Society ka la pahah ia ka jingujor jong ka sha u director ka Urban affairs ban dawa na u ba dei ban pynshitom ia u Manas Choudhury MLA barim ka Mawprem uba long ruh u Chairman ka Implementation Committee ka 21-Mawprem konstitwensi ryngkat bad ar ngut kiwei pat kiba kynthup ia U Pinak Gupta, Secretary bad U AK Bhattacharjee Treasurer namarba ki la pyndonkam bakla ia ka pisa na ka bynta kiba bun ki jingtrei ba ka sorkar ka la mang ban pyntrei na ka jingmyntoi u paidbah.
Ka jingjah klep ka pisa ka long haduh T.1.34,99,085 klur tyngka bad katei ka pisa ka dei kaba la dep sei naduh u snem 2005-2006 shaneng. Ka Greater Laban ka la ujor ba naduh ba la sei ia ka pisa kaba la pyllait da u CEO SMB ym pat shym la iohi dak satia wat tang ia iwei I kam ruh bad ym shym la ioh ia ka sertiphiket ba la pyndonkam ia ka pisa (UC).
Ki la don bun ki jingtrei ba la dep ban sei pisa kaba mar shiteng na ka jingmang pisa ha ka kam hynrei ki la don katto katne ki kam ba la pyndep hynrei ym shym la ioh jingthoh eiei shaphang kumno la pynlut ia ka pisa, ki don ki jingtrei ki bym pat sdang bad ki don ruh kiba dang pyntrei hynrei kiba bun hi la iohi katkum ka jingujor jong ka Greater Laban community Development Society ba ym shym la ioh jingtip eiei kumno kitei ki lai ngut ki la pynlut ia ka pisa ba la sei haduh T.1 klur tam naduh u snem 2005 -2006 shaneng.