Bam ka ding ia ka iing ha Nongdom, kynthup ia I khyllung ba 3taiew

Mawkyrwat, 1 Rymphang:
Ha kawei ka jingjia kaba sngewsangsot i wei i khyllung i ba dang 3 taiew Iba dei ruh i khun kynthei jong i kong Jup L. Nonglait bad u bah Nek Wahlang i la duh noh ia ka jingim ha ka jingjia pluh iing kaba la jia hynne ka step ha ka shnong Nongbrei Nongdom South West Khasi Hills District.
Katkum ka tyllong khubor ba la ioh lum da u nongthoh khubor la ong ba katei ka jingjia pluh iing, ka la jia ha kapor 6 baje eiei mynstep bad ha katei kapor u kpa jong katei ka iing ryngkat I khyllung ba dang 3 snem ki la mih ban leit noh sha lum katba ka kmie ryngkat ar ngut ki khun ba kynthup ia iwei ba la 6 snem bad I tei I ba la khlad noh ki dang don ha iing.
Shuh shuh ka tyllong khubor ka iathuh ruh ba hadien ba ka kmie jong i tei i khyllung kala dep ban treikam ha iing kala khreh noh ban leit tong um na ka jaka tong um kaba kham pajin na ka iing bad kala pynthiah noh ia i tei i khyllung ha jingthiah katba i hynmen jong i tei i khyllung iba la 6 snem i lamih ban lehkai sha phyllaw.
Hynrei kaba sngewsih ka long ba ynda ka kmie jong kitei ki khyllung kala wanphai na ka jaka tong um kala iohi bad lap pynban ba ka iing ka la kem ding ha kaba ka ding kaba klang bha ka la sdang ban bamduh ia ka iing jong ka bad ha katei kapor da ka jingkynmaw iala I khun ba don hapoh iing kala pyrshang ban her shapoh iing da ka jingthmu ban leit sei ia I khyllung hynrei ki para marjan kiba la iohi ia katei ka jingjia ki la bat noh iaka namar ba ka ding ka la klang palat.
Ia ka daw jong katei ka jingjia haduh bala thoh ia kane ka khubor ym shympat la lah ban pyntikna ba ha kano ka rukom ba katei ka iing kala kem ding bad nalor ba katei ka iing kadei ka iing dieng ka ding kala ioh ban bam duh lut khait kynthup ia i tei i mynsiem i ba dang 3 taiew.