NongpohNaiwieng: Kawei ka iing kaba don ha shnong Pahamrioh, ha Ri Bhoi, ka la ingkhong bad kylla dpei hadien ba ka la shah bamduh ha ka ding, kaba la pluh kynsan ha katei ka ing mynta ka step ha ka por 2 baje ei ei mynstep.
Katei ka iing kaba la shah bamduh ha ka ding, ka dei ka iing jong ka Narolin Khongjoh bad u Bah Omiwell Marbaniang, ha kaba watla ka iing ka la julor, donbok pat ba ha katei ka jingjia pluhiing ym shem la don kiba la mynsaw, hynrei ka la don pat ka jingjulor ha ka jingduhnoh ia ki tiar iing tiar sem bad kaba la wanrah ia ka jingduhnong kaba khraw.
Ki trai jong katei ka iing ki la iathuh ba kim don jingtip ei ei ruh em, hynrei ki shu kyndit haba ka ding ka la klang bad bamduh ia ka iing lem bad ki jingdon jingem baroh.
Ha kawei pat ka liang, hynne hi ka sngi, na ka liang ki dkhot ka RBYF, Nongpoh Circle, ki la leit ban nohsynniang da ki Tin sopiing bad Blanket sha katei ka longiing kaba la iakynduh ia katei ka jingjia ba sngewsih. Kiba la iadonlang ha katei ka sngi ki kynthup ia u Bah Joseph Syngklim President ka Nongpoh Circle, u Bah Fullbok Lyngdoh, General Secretary, u Bah K. Suting, Rangbah shnong ka Pahamrioh lem bad kiwei kiwei.