Bam duh ka ding, da ki phew lak bad ia ka Baibl ha 3mer shiteng

Shillong:Ha ka sngi saitjain, kawei ka ing ka la shah bam duh na ka ding kaba klang ha ka ka dong 3mer shiteng jong shnong Sawmer Upper Shillong, kane ka jingjia ka la jia ha ka por kumba 1:30 mynstep bad kane ka ing ka dei ka jong u bah Diswell Phanbuh.

Ha kaba iakren bad u trai jong kane ka iing, u bah Bah Diswell Phabuh, u iathuh ba ka jingsdang jong ka jingkem ding ka dei na ka kamram shongkai bad ia kane la lap da ka kurim jong u bad da ka jingkyndit u la iohi ia ka ding kaba la sdang ban klang bad kumta u la kyrsiew ia baroh ki khun bad ia ki marjan marpa ban wan iarap, hynrei kat haduh ban da lah ban tem katei ka ding ka la bam shngiam ia ka iing baroh kawei.

Ha kaba iadei bad katei ka jingjia ki marjan marpa ki la wan ban iarap, hynrei kim shim la lah ban iarap, namar ka jingjur jong ka ding bad dei haduh ban da poi ki kali pynlip ding ha ka por 2 baje eiei ba sa lah ban pynlip ia katei ka ding kaba rhem.

Ha kaba iakren bad kiba sah marjan bad u bah Phanbuh, ki la iathuh ba kim don jingtip eiei, namar ba ka la dei ha ka por ba ki la iohthiah bha, hynrei ki la kyndit haba iohsngew ia ka jinghylla na katei ka longing. “Ngi la pyrshang ban iarap ban tem ia ka ding” ong u Bah Khrawbor Lyngdoh, hynrei ka la dier palat ha kaba ki thylliej ding kiba la bam lut ia ka iing baroh kawei.

Ha kaba iadei bad ka jinglut jingsep, halor katei ka jingjia, na ka liang jong Bah Phanbuh u la ong ba kan nym duna ia ka shiphew lak tyngka bad ka jingduh ka long ia ka kor komputor, ki tiar sumar kum ka jingthew BP, bad shini namar ba ka kurim jong u,ka dei kaba don ka jingshitom.

U Bah Phanbuh u la ong ba ha kane ka jingjia kaba u lah ban sei na iing ka long tang ka synduk pisa ba ju pyndonkam man la ka sngi, ryngkat bad ki ksiar ki ksah, katba don ei, hynrei ia kiwei kiwei ki tiar wat ka Bible ruh la bam shngiam da ki thylliej ding.

Te na ka liang jong u Bah Phanbuh u buh ka jingkyrpad na ka liang jong ki nongmihkhmat ban iarap lem ia u halor kane ka jingduh mynne ka sngi bad la iathuh ba na ka liang jong u MDC ka thain u la leit ban jurip ia katei ka ing ha ryngkat u MLA.