“Balei u soitan u bitar?”

AIS Suja

Ngi ong ba u soitan u bitar, Balei u soitan u bitar? Ka ktien u Blei ka iathuh ia kata ha ngi kumne: “Naba kumta to iakmen ko ki bneng bad phi kiba shong ha ki, kordit ia kata ka khyndew, bad ia kata ka duriaw!
Naba uta u KSUID u la leit hiar ha phi, uba don ka jingbitar kaba khraw, naba u tip ba u don sa tang khyndiat ka por. Jingpynpaw 12:12. Katkum kane ka dkhot ngi iohi ba ka bneng ka kmen, bad ki bneng ruh ki kmen bad kita kiba shong ha ki bneng, ka daw ka long ba mynta une u ksuid bad u soitan u la shah shop noh sha khyndew ne sha kane ka pyrthei ba shong ki briew. Ki riewkhuid bad ki angel ha bneng ki kmen, namar u soitan um don shuh hangtai ha ka bneng kaba ar (second heaven).

Hynrei ka kordit ban kan long ia kane ka pyrthei ynda la shop ia u ksuid u soitan na katei ka bneng kaba ar sha kane ka pyrthei bad u don ka jingbitar kaba khraw naba um ioh shong shuh wat ha kata ka bneng kaba ar (heavenly realm), bad u tip ruh shisien ba la shop ia u, u don sa tang khyndiat ka por ban ioh shukor ia ki bynriew ka pyrthei, bad u tip ruh ba kaba kut jong u kan long ha dujok ding. To ngin ia peit mynta mano ba beh noh ia u na kata ka bneng kaba ar. Ban pynhap ia u ksuid u soitan na ka bneng kaba ar dei da ka thma, hapdeng u Lucifer soitan bad u angel Michael. “Bad ka thma ka la long ha bneng (jaka shong u soitan) u Michael bad ki angel jong u ki la ialeh thma ia uta u iakjakor: te uta u iakjakor ruh bad ki angel jong u (ki ksuid) ki la ialeh thma. Hynrei kim shym la jop (u Lucifer soitan bad ki ksuid ki rem), lymne ia ka jaka jong ki, ym shym la shem shuh ha bneng, (la pynjot ia ka jaka sah u Lucifer soitan da u Michael bad ki angel jong u). Te la shop arsut ia uta u Iakjakor (soitan) bakhraw uta u bsein tymmen ia uba la khot u KSUID bad u SOITAN uba shukor ia ka pyrthei baroh kawei: La shop noh arsut ia u sha khyndew bad ia kita ki angel jong u la shop noh arsut lem bad u” Jingpynpaw 12:7-9.

To ngin ia peit ha kane ka por ba la shop ia u soitan na ka ta ka bneng kaba ar. Katkum ka Bible ngi shem ba ha ka por ban pynhap pat ia u Lucifer soitan na ka bneng kaba ar sha pyrthei kan jia hapoh ka por kaba shiteng kata ka taiew ka mut shiteng kita ki 7 snem hadien ba la wan mih u kulai Balieh, kulai basaw, bad kulai baiong. Jingpynpaw 6:1-6. Kine ki long ki por ba ki Jiw ki don jingknia hapoh kata ka Temple kaba Lai (Third Temple). Tang shu dep ka kulai baiong, yn pynhap ia u Lucifer soitan sha pyrthei da u Michael. Ha kane ka juh ka por, kan don ka jingmihpat kiba iap bad ka jingrongnoh ia kiba dang im. Kam mut ba baroh kin iamih pat bad baroh yn shah rongnoh (rapture) hynrei tang ia kiba la sait khuid ialade ha ka snam u khun langbrot u Blei.
Tang shu pynhap ia u soitan, wut kan don ka jingrongnoh (rapure) ba kin ym ioh ban mad ia ki jynjar bah bakhraw, namar kin her sa shisien kum ki pukni ha ka jingwan ba jar jar u Jisu Khrist kum u nongtuh, ban ia shem ha suinbneng. 1 Thessoloni 4:13-17. Tang shu pynhap ia u Lucifer soitan un leit rung ha u briew ka pop (man of sin), un pynsangeh ia ki Jiw na kata ka jinglehniam knia (sacrifices) jong ki. “Hamar kaba shiteng (sa tang ki 7 snem) jong kata ka Taiew (Jong ka shitaiew Bakhadduh), un pynduh noh ia kata ka jingknia bad jingainguh bam, and in the midst of the week He shall cause the sacrifices and oblation to cease and for the over spreading of Abomination he shall make it desolate even until the consumption and that determined shall be poured upon the desolate” Daniel 9:27.

Kata ka dei ka por ba u Lucifer soitan u la don hangne ha pyrthei u da bitar shla ia ki Jiw bad ia ka pyrthei baroh kawei “Kat haduh ba u shong ha ka Temple u Blei u da leh Blei ialade” 2 Thessoloni 2:4. Mynta u soitan uba bitar u la pynsangeh ia ki Jiw ban ai jingknia ha kata ka Temple balai (kaba yn sa shna), un leit shong ma u pat hapoh Temple ban leh ialade kum uBlei. Na kata ka Temple kaba Lai, u soitan un synshar ia kane ka pyrthei 3 snem shiteng ne 42 bnai ne 1260 sngi kynthup ia ki 30 sngi ban long 1290 sngi. Daniel 9:27 / Daniel 12:12.
Dei hangne kein – “Kordit ia kata ka khyndew bad ia ka duriaw naba u ksuid u la hiar ha phi uba don ka jingbitar bakhraw” Jingpynpaw 12:12. “Naba hangta ka kordit bah kan long kaba ym pat ju long naduh myndang long ka pyrthei haduh mynta em, lymne kan ym long shuh ruh” Mathaios 24:21.
Namar kata, ka jingtei pat ia ka Temple kaba Lai ka long ka dak ka jingkutnoh kiei kiei kiba ha kane ka pyrthei, ka por ban tei ka la jan. Kordit ia kiba ym shym la kylla bamut.”Wat niewbein ia ki jingiathuhlypa” 2 Thessoloni 5:20.
U Blei mynta u hukum ia ki briew baroh kylleng la kylleng BAN KYLLA KABA MUT” Ki kam ki Apostol 17:30-31.