“Balei u Jisu u iap?”

AIS Suja

Balei u Jisu u iap? Ka long ka jingkylli baroh ka pyrthei ka kylli, don kiba ong kumno un iap haba u dei u khun u Blei bad u dei hi u Blei. Hynrei ka jingthmu na bymjukut ka jong u Kpa (Blei) ka long ban phah ia u khun ban shah iap halor diengphna ha Kalbari.
Ka jingiap u Jisu ka long ka plan kaba la slem bah naduh bymjukut, hynrei ka pyrthei kam pei phang ia kata bad kam lah ban mutdur. Ha ka jingshisha u Blei naduh ka Testament barim u la don ka jingmut ban phah ia la u khun, bad ia kane la pynbna da ki Nong iathuhlypa (Prophets) kum u Isaiah bad kiwei. Ha u Isaiah 53, la ong ba uta u khun u Blei (Jisu) “U long ba la ibein ba la kyntait da ki briew baroh, u riew ki jingsngewsih uba tip ia ka khuslai ……. U la buh halor jong u ia ki jingbymhok jong ngi baroh ……. Isaiah 53: 1-12.
Ka jingwan longbriew u Jisu sha pyrthei, bad ka jingshah iap halor ka diengphna, ka la pyllong ia ka Jutang kaba thymmai (New Covenant) dei namar ba u Blei um mon shuh ban ai jingknia na ka bynta ki pop da ka snam ki mrad hynrei da ka snam u Jisu Khrist u khun u Blei tang shisien ai ban map ia ki pop junom.
“U Blei um mon shuh da ka snam ki blang bad ki khun masi, hyneri da ka snam jong u hi, u la leit rung tang shisien sha kata ka jaka kyntang haba u la ioh ia ka jingsiewspah bymjukut” Hebru 9:12.
“Te kumta, u Jisu u long u Ksiang (Nongpyniasuk) ka Jutang bathymmai ba haba la jia ka jingiap ban siewspah ia kita ki jingpalat kiba hapoh kata ka JUTANG KABA NYNGKONG” Hebru 9:15.
Ka jingiap u Jisu halor diengphna namar kata ka long ban siewspah ia ki pop ka pyrthei. U Ioanis u ong – “Ha khmih u khunlangbrot u Blei, uba kit noh ia ka pop pyrthei” Ioannis 1:29.
Ka jingshahiap halor diengphna, dei ka daw kaba khraw tam ba u Blei u la pyni shynna sha ka pyrthei ba u ieit haduh katta katta ia ki briew ha pyrthei. Ka ktien u Blei ka ong – “Naba u Blei u la ieit katta katta ia ka pyrthei haduh ba u la aiti noh ia la u khun ba la kha marwei ……. naba u Blei um shym la phah ia la u khun sha ka pyrthei ba un pynrem ia ka pyrthei hynrei ba yn pynim ia ka pyrthei da u” Ioannis 3:16.
“Kumta da ka jingiap u Jisu halor diengphna ka la pyllong ba ka Testament Bathymmai kan khlain bor ban ia ka Testament barim mynba la shah ia ki briew ban knia da ka snam ki mrad. “Namar ka Testament ka donbor haba la jia ka jingiap: namar mynno ka la don bor haba dangim uta uba la thaw ia ka?” Hebru 9:17.
“Kumta u Khrist haba la knia ainguh tang shisien ia u, ia ka ban bah noh ia ki pop jong kiba bun, un mihpaw ha kaba arsien khlem bah ia ka pop shuh” Hebru 9:28.
U Jisu u long u Khunlangbrot jong u Blei, u la dep shah knia halor diengphna, u la iap, u la mihpat. “Haba ula lah ainguh tang kawei ka jingknia namar ki pop junom, u la shong ha ka kti ka mon u Blei” Hebru 10:12. Ka mut ba u Jisu u la iap u la mihpat bad u don ha bneng ha ka kti ka mon u Blei mynta.
U Jisu u la iap; ka jingiap ka la jia ha ka sngi thohdieng April, 32 A.D. Kumta la tip ia ka sngi thohdieng kum ka sngi thohdieng babha ne Good Friday.
Ka thohdieng Babha namar ba u Jisu u la iap na ka bynta ki briew baroh ka pyrthei ban siewspah ia ki briew na ki pop baroh. Kumba ong ha u Ioannis “Ha khmih u khunlangbrot u Blei uba kit noh ia ki pop ka pyrthei” Ioannis 1:29.