Balei slem ban thung Chairman MPSC, kylli u Bah Paul

Shillong, 8 Risaw:
U MLA ka UDP u Bah Paul Lyngdoh u la buh jingkylli ia ka sorkar balei ka slem ban thung ia u chairman ha ka Meghalaya Public Service Commission (MPSC).
“Ka MPSC ka la shong khlem u chairman ba pura naduh u Nohprah mynshem snem. Nga kwah ban tip kaei ka daw kaba la shim por slem ban thung ia u chairman ba pura jong kane ka Commission”, la ong u Bah Paul haba kylli hynne hapoh iing dorbar thawain ka jylla.
Ka sorkar haduh mynta kam pat thung ia u chairman ba pura jong ka MPSC hadien ba u Ashok Kumar Tigidi u la shong thait ha u Nohprah mynshem snem.
U Bah Paul u la ong ba ka jingslem ban thung ia u chairman ka MPSC ka la ktah jur ia ka jingtreikam kane ka tnad thungkam sorkar ka jylla. “La iathuh ia ngi ba bun ki jinginterbiw kam la pynsangeh namar ba ym don u chairman. Namar kane, bun ki samla thep kam na ka bynta ki kam bapher bapher ki sah ha ka umdum namar ba kim sngew thikna ia ka lawei” la ong u Bah Paul.
Hynrei haba jubab ia kane, u Myntri Rangbah ka jylla u Mukul Sangma u la ong ba ka sorkar ka dang eksamin ia kane ka kam bad shen kan sa thung noh ia u chairman.
“Nga kwah ban pynthikna ia ka iing dorbar ba ia u chairman ka Commission yn sa thung noh kloi” la ong u Mukul.
U Myntri Rangbah u la ong ba ka sorkar ka la thaw ia ka Search committee ba la khlieh da u Chief Secretary Bah WMS Pariat ba kynthup ia u Bah GP Wahlang bad ka principal barim ka Shillong College ka Kong MPR Lyngdoh kum ki dkhot.
Ia mynta, la shu pyniaid da ka acting chairman ka FB Sangma.
U lakyntait ba ka sorkar ka dang ap ia u Chief secretary ba mynta ban shong thait ban thung pat kum u chairman ka Commission.