BALEI MIH KI JINGKYNNOH PYRSHAH IAKA SUPPLY DEPTT HA KA PDS

Editor,

Nga la ioh ban pule shibun ki report, ki artikil bad ki shithi sha ki Editor jong ki kotkhubor halor ki kynrum kynram, ki jingleh thawlir thawsha, jingleh kulmar bad ki jingleh klop ha kaba iadei bad ki kyrdan bapher bapher ban sam ia u khaw, shini, atta, sharak bad kiwei kiwei sha ki nongbam nongsa rashon jong ki shnong bapher la ha sor ne nongkyndong. Ha ki snem kiba kham mynshuwa lei lei bun ki jingkynnoh ba u khaw u sniew lane u pyut bym long ban bam, u atta lei lei ym ju sam.

Ka don ka jingkynnoh ia ka FCI ba ka ai da u khaw pyut, ka la don ka jingkynnoh ba la leh thok ki whole seller bad ki dealer (fsd), ba ym pat ioh khaw na FCI bad kumta ter ter bad ki long kijuh shi kumjuh. La thait bad la ngiah ki paidbah. Tip ka leh aiu kata ka FCI, ki la leh aiu kita ki wholeseller bad ki dealer, ka la leh aiu kata ka Supply department, ki la leh aiu kita ki director, ki DDS bad ki Inspector, ym don ba ai ka jubab ka ba shai bad ka ba pynhun ia ki paidbah.

Ka jingkynnoh ia ka Supply halor ka PDS ka la long kaba shyrkhei. La kynnoh ba ki Minister bad ki ophisar Supply ki longbriew manbriew bha bad ki la tei ia ki iing paki dulan ha bun jaka. Hynrei mynta ha Kane juk ka jingkynnoh na ki paidbah ka la kham duna. U khaw ration u la Kham bha, ka shini kam poi shuh la 2 snem bad bun u paidbah u ud ba kim ioh ia u Atta bad ia ka umphniang sharak ha ki nongkyndong na ka ration ne PDS. Ki la pynpaw ia ka jinglyngngoh shibun ban iohsngew ba ha sor ki dukan ration ki sam atta bad sharak katba ha kyndong pat ym sam. Ki paidbah ki lyngngoh balei ka Supply ka leh shiliang eh ia ki nongkyndong.

Ha kine ki por pat la iohi ha ki kotkhubor ba ha nongkyndong don bun ki shnong kiba shah leh thok bad shah leh klop ha ki dealer, ki shah khate ia ka bhah, ki shah pynkiew for ia ki mar ration, ki phah siew peisa baikit bad wat ia u khaw ba ai ei ka sorkar India ruh ki phah siew peisa. Ka long kaba sngewsih ban iohi ha ki kotkhubor ba ka la don ka jingleh kulmar ha ka sam ration kum ha Marshan Nongrim, WKH, ha Marpna, EKH, ha Mawshun, EKH, shah pynduh ration kumba 10 ne 15 iing ha Ummat-I bad Ummat-II ha Ri Bhoi bad ha kiwei kiwei ki shnong. Kine kim dei ki khubor ba sngewtynnat ban iohsngew bad ka pynpaw ba ka Supply Department kam shym la treibha la ka kam, khamtam

Ki DDS, ki Inspector bad kiwei ki field staff. Kane ka pynpaw ba kine kim bud-dien, kim trei bha lane ki iasylla bad ki dealer lane bad ki wholeseller. Sa kawei ka bynta ka bym shym la trei ia la ka jong ka kam ki dei ki Village Vigilant Committee ha ki shnong bad ki dong ne kyntoit ba kim trei ia la ka kam lane ki iasylla bad ki dealer. Ka Supply Department ka dei ban pyrkhing bha ia ki dealer bad ia ki Vigilant Committee. Lada dang iai-jia kum kine kiei kiei ka mut ba kam don ka inspection kaba pyrkhing na ka liang ki Supply Inspector bad na ki Sub-inspector lane kine ki ai mon ia ki dealer ba la don ka jingiasngewthuh jingmut. Ka jingai jingmut hangne ka long ba dei ban pynbeit thymmai noh nadong shadong ia ka rukom sam ration(complete overhauling of the PDS). Ym lah shuh ban shu bud bad bteng ia kajuh shi kajuh ka rukom leh.

Kumba ka long mynta, ka sorkar na ka bynta ka rashon (ration) lane PDS item, ka ai ia u khaw, u Atta, bad ka umphniang sharak ha kito kiba don ki Card Ration ha ki shnong bapher bapher. Ki Card Ration ruh ki don lai jait- ka Card AAY kaba stem, ka Card PHH kaba pink bad ka Card NFSA kaba blue. Ka dor khaw ka long T.3/- shi kilo ia ka Card stem bad Card pink, bad T.9.62p shi kilo ia ka Card blue. Ha ki shnong ia Card blue ka dor khaw rashon ka dei T.11 ne T.12 shi kilo.

Na ka bynta u Atta pat ka dei ia baroh kiba don Card Rashon tangba tang 160.48 gram shi khlieh briew bad ka dor jong u Atta ka dei T. 8.50p shi kilo. Ka umphniang sharak pat la ai 2 litre kawei ka Card ia baroh ki ba don Card Rashon ha ka dor T.16.94p shi litre. Lah ban ai 3 litre run shi Card lada ioh bhah bun nalor. Na ka bynta ka umphniang sharak pat ka shong ha ka allotment (jingai bhah) ka Supply Department ia ki District bapher bapher. Ka dor ruh ka kylla na ka por sha ka por katkum ba buh ki kompeni pynmih umphniang.

Bah Philip Marwein,

Shillong.